శ్రీవారి బ్రహ్మోత్సవాలు.. సీఎం చంద్రబాబును ఆహ్వానించిన టీటీడీ

D Spiritual: Sept 12: తిరుమల బ్రహ్మోత్సవాలకు సీఎం చంద్రబాబుకు ఆహ్వానం

తిరుమలలో త్వరలో ప్రారంభం కానున్న శ్రీవారి సాలకట్ల బ్రహ్మోత్సవాలకు హాజరుకావాల్సిందిగా ముఖ్యమంత్రి నారా చంద్రబాబు నాయుడును తిరుమల తిరుపతి దేవస్థానం (టీటీడీ) చైర్మన్ బీఆర్ నాయుడు ఆహ్వానించారు.

శనివారం ఉండవల్లిలోని సీఎం క్యాంపు కార్యాలయంలో టీటీడీ చైర్మన్ బీఆర్ నాయుడుతో పాటు ఈవో, బోర్డు సభ్యులు జ్యోతుల నెహ్రూ, పనబాక లక్ష్మి, జానకీదేవి తదితరులు ముఖ్యమంత్రిని కలిశారు. ఈ సందర్భంగా వేద పండితులు సీఎం చంద్రబాబుకు వేదాశీర్వచనం అందించి, శ్రీవారి ప్రసాదాలను అందజేశారు.

బ్రహ్మోత్సవాల ఏర్పాట్లపై సీఎం సమీక్ష

అనంతరం శ్రీవారి బ్రహ్మోత్సవాల ఏర్పాట్లు, భక్తులకు కల్పించాల్సిన వసతులు, భద్రతా చర్యలపై టీటీడీ చైర్మన్, ఈవోలతో సీఎం చంద్రబాబు వివరంగా చర్చించారు.

తిరుమలకు వచ్చే సామాన్య భక్తులకు ఎలాంటి అసౌకర్యం కలగకుండా విస్తృత ఏర్పాట్లు చేయాలని సీఎం అధికారులను ఆదేశించారు. భక్తులకు శ్రీవారి దర్శనం సులభంగా జరిగేలా చర్యలు తీసుకోవాలని సూచించారు.

వాహన సేవలు, విశేష ఉత్సవాలకు సంబంధించిన పూర్తి సమాచారంతో రూపొందించిన ప్రత్యేక బుక్‌లెట్‌ను కూడా టీటీడీ అధికారులు అందుబాటులోకి తీసుకొచ్చారు.

బ్రహ్మోత్సవాల తేదీలు ఇవే

ఈ ఏడాది తిరుమల శ్రీవారి సాలకట్ల బ్రహ్మోత్సవాలు సెప్టెంబర్ 15 నుంచి 23వ తేదీ వరకు అత్యంత వైభవంగా నిర్వహించనున్నారు. సంప్రదాయం ప్రకారం తొలిరోజున రాష్ట్ర ప్రభుత్వం తరఫున సీఎం చంద్రబాబు నాయుడు శ్రీవారికి పట్టువస్త్రాలు సమర్పించనున్నారు.

అనంతరం అక్టోబర్ 12 నుంచి 20వ తేదీ వరకు శ్రీవారి నవరాత్రి బ్రహ్మోత్సవాలు జరగనున్నాయి. ఈ ఉత్సవాలను పురస్కరించుకుని టీటీడీ ఇప్పటికే అన్ని రకాల ప్రత్యేక ఏర్పాట్లను వేగవంతం చేసింది.