D News: తెలంగాణ శాసనసభ సమావేశాలు ప్రారంభమైన తొలిరోజే వాడివేడిగా సాగుతున్నాయి. ఒకవైపు బీఆర్ఎస్ ఎమ్మెల్సీ తాతా మధు వ్యవహారం సభను కుదిపేస్తుండగా, మరోవైపు 22-A భూముల అంశం చర్చకు వచ్చింది.
22-A భూములపై చర్చకు బీజేపీ సభ్యులు వాయిదా తీర్మానం ఇచ్చారు. అయితే స్పీకర్ ఆ తీర్మానాన్ని తిరస్కరించడంతో బీజేపీ ఎమ్మెల్యేలు సభ నుంచి వాకౌట్ చేశారు.
22-A భూములపై వెంటనే చర్చ చేపట్టాలని బీజేపీ ఎల్పీ నేత ఏలేటి మహేశ్వర్ రెడ్డి డిమాండ్ చేశారు. ఆయన నేతృత్వంలో బీజేపీ ఎమ్మెల్యేలు సభలో తీవ్ర నిరసన తెలిపారు.
22-A భూముల విషయంలో జరిగినట్లు ఆరోపిస్తున్న అక్రమాలపై ప్రభుత్వం స్పష్టమైన హామీ ఇవ్వాలని ఏలేటి మహేశ్వర్ రెడ్డి కోరారు. ఈ వ్యవహారంపై జ్యుడీషియల్ విచారణ జరిపించాలని, బాధ్యులపై కఠిన చర్యలు తీసుకోవాలని డిమాండ్ చేశారు.
గతంలో 22-A భూములపై ఫోరెన్సిక్ ఆడిట్ చేయిస్తామని ప్రభుత్వం ప్రకటించిందని ఆయన గుర్తుచేశారు. ఆ ఆడిట్ ప్రస్తుతం ఎక్కడివరకు వచ్చిందో, నివేదిక ఏమైందో ప్రభుత్వం సమాధానం చెప్పాలని ప్రశ్నించారు.