D Educt: Sept 7: ప్రపంచవ్యాప్తంగా సాంకేతిక రంగంలో వేగంగా వస్తున్న మార్పులకు అనుగుణంగా విశ్వవిద్యాలయాలు ఉన్నత విద్యలో పరిశోధనలు, ఆవిష్కరణలకు మరింత ప్రాధాన్యం ఇవ్వాలని గవర్నర్ శివప్రతాప్ శుక్లా సూచించారు. జాతీయ ఉపాధ్యాయ దినోత్సవం సందర్భంగా రాష్ట్రంలోని ఉపాధ్యాయులకు ఆయన శుభాకాంక్షలు తెలిపారు.
ఉన్నత విద్యామండలి ప్రచురించిన ‘తెలంగాణ జర్నల్ ఆఫ్ హయ్యర్ ఎడ్యుకేషన్’ తాజా సంచికను ఈ నెల 5న లోక్భవన్లో గవర్నర్ శివప్రతాప్ శుక్లా ఆవిష్కరించారు. ఈ సందర్భంగా ఉన్నత విద్యారంగంలో పరిశోధన, ఆవిష్కరణల ప్రాధాన్యంపై ఆయన మాట్లాడారు.
ఉన్నత విద్యామండలి ఛైర్మన్ ఆచార్య వి. బాలకిష్టారెడ్డి నేతృత్వంలో పరిశోధనా సంస్కృతిని, అకడమిక్ ఎక్స్లెన్స్ను బలోపేతం చేసేందుకు చేస్తున్న కృషిని గవర్నర్ అభినందించారు. విద్యార్థులు, అధ్యాపకులను పరిశోధనల వైపు ప్రోత్సహించడం ద్వారా ఉన్నత విద్యా ప్రమాణాలను మరింత మెరుగుపరచవచ్చని పేర్కొన్నారు.
26న పరిశోధనా సంస్థలతో సదస్సు
ఈ నెల 26న హైదరాబాద్లో **‘రీసెర్చ్ ఎడ్యుకేషన్ అడ్వాన్స్మెంట్ కాంక్లేవ్ ఇన్ హైదరాబాద్’ (రీచ్)**ను నిర్వహించనున్నట్లు ఉన్నత విద్యామండలి ఛైర్మన్ ఆచార్య వి. బాలకిష్టారెడ్డి గవర్నర్కు తెలిపారు.
ఈ సదస్సులో పరిశోధనలు, ఆవిష్కరణలు, వివిధ సంస్థల మధ్య సహకారం, ఉన్నత విద్య భవిష్యత్కు సంబంధించిన అంశాలపై విస్తృతంగా చర్చించనున్నట్లు ఆయన వివరించారు. సదస్సులో భాగస్వామ్యం కోసం హైదరాబాద్లోని వందకుపైగా పరిశోధనా సంస్థలకు ఇప్పటికే లేఖలు పంపినట్లు తెలిపారు.
ఈ కార్యక్రమంలో ఉన్నత విద్యామండలి కార్యదర్శి ఆచార్య శ్రీరాం వెంకటేశ్, విద్యామండలి ఓఎస్డీ రాధాకృష్ణ తదితరులు పాల్గొన్నారు.