D-News: రక్షాబంధన్‌ సందర్భంగా మాజీ తెలంగాణ మంత్రి, బీఆర్‌ఎస్‌ సీనియర్‌ నేత టి. హరీశ్‌రావు తన నివాసంలో పండుగ వేడుకలు నిర్వహించారు. సిద్దిపేట నియోజకవర్గంతో పాటు రాష్ట్రంలోని వివిధ ప్రాంతాల నుంచి వచ్చిన పార్టీ కార్యకర్తలు, బీఆర్‌ఎస్‌ మహిళా నాయకులు, మహిళలు పెద్ద సంఖ్యలో ఈ కార్యక్రమంలో పాల్గొన్నారు.
హరీశ్‌రావుకు మహిళలు రాఖీలు కట్టి పండుగ శుభాకాంక్షలు తెలిపారు. సంప్రదాయబద్ధంగా ఆశీర్వదిస్తూ తమ అభిమానాన్ని, ఆప్యాయతను వ్యక్తం చేశారు. మహిళలు పెద్ద సంఖ్యలో తరలిరావడంతో ఆయన నివాసం వద్ద పండుగ వాతావరణం నెలకొంది.
మహిళల హక్కులు, గౌరవం కాపాడటమే బాధ్యత
రక్షాబంధన్‌ కేవలం సోదరసోదరీమణుల అనుబంధానికి సంబంధించిన పండుగ మాత్రమే కాదని, ప్రేమ, పరస్పర నమ్మకం, రక్షణకు ప్రతీక అని హరీశ్‌రావు పేర్కొన్నారు. మహిళల హక్కులు, గౌరవాన్ని కాపాడేందుకు జీవితాంతం అండగా నిలవాలనే బాధ్యతను ఈ పండుగ గుర్తుచేస్తుందని అన్నారు.
తెలంగాణ మహిళల సంక్షేమం, భద్రత, సామాజిక సాధికారత కోసం తన వంతు కృషి కొనసాగిస్తానని హరీశ్‌రావు తెలిపారు. మహిళలు ఆర్థికంగా స్వావలంబన సాధించేందుకు, సమాజంలో మరింత గౌరవప్రదమైన స్థానం పొందేందుకు అవసరమైన అంశాలపై నిరంతరం తన గొంతు వినిపిస్తానని చెప్పారు.
ఈ సందర్భంగా తనకు రాఖీలు కట్టి శుభాకాంక్షలు తెలిపిన ప్రతి ఒక్కరికీ హరీశ్‌రావు కృతజ్ఞతలు తెలిపారు. మహిళలు చూపించిన ప్రేమ, అభిమానం తనకు ఎంతో ఆనందాన్ని కలిగించాయని అన్నారు.
అనంతరం తెలంగాణ ప్రజలందరికీ రక్షాబంధన్‌ శుభాకాంక్షలు తెలియజేస్తూ, ప్రతి కుటుంబంలో సంతోషం, శాంతి, ఐక్యత, సౌభాగ్యం వెల్లివిరియాలని ఆకాంక్షించారు.