నందమూరి అభిమానులు ఎంతోకాలంగా ఎదురుచూస్తున్న క్షణం దగ్గరపడుతున్నట్లు తెలుస్తోంది. నందమూరి నటసింహం బాలకృష్ణ తనయుడు మోక్షజ్ఞ తేజ సినీ అరంగేట్రానికి సన్నాహాలు జరుగుతున్నాయనే వార్తలు మరోసారి టాలీవుడ్లో వైరల్ అవుతున్నాయి. చాలా కాలంగా మోక్షజ్ఞ ఎంట్రీపై అనేక వార్తలు వచ్చినప్పటికీ.. ఇప్పుడు ఈ ప్రాజెక్ట్ విషయంలో ఓ క్లారిటీ వచ్చినట్లు ఇండస్ట్రీ వర్గాల్లో ప్రచారం జరుగుతోంది.
‘బింబిసార’, ‘విశ్వంభర’ వంటి భారీ చిత్రాలను తెరకెక్కించిన దర్శకుడు వశిష్ట మోక్షజ్ఞను హీరోగా పరిచయం చేయబోతున్నారనే టాక్ ప్రస్తుతం ఫిల్మ్ నగర్లో జోరుగా వినిపిస్తోంది. ఈ కథకు బాలకృష్ణ కూడా గ్రీన్ సిగ్నల్ ఇచ్చినట్లు సమాచారం.
ప్రశాంత్ వర్మ ప్రాజెక్ట్ ఎందుకు ఆగింది?
వాస్తవానికి ‘హనుమాన్’ ఫేమ్ దర్శకుడు ప్రశాంత్ వర్మ దర్శకత్వంలో మోక్షజ్ఞ ఎంట్రీ ఇవ్వాలని గతంలోనే ప్రణాళికలు సిద్ధమయ్యాయి. ఈ సినిమాకు సంబంధించి అధికారిక ప్రకటన కూడా వచ్చింది. అయితే అనూహ్య కారణాలతో ఆ ప్రాజెక్ట్ చివరి దశలో నిలిచిపోయింది.
దీంతో దాదాపు ఏడాది పాటు గ్యాప్ తీసుకున్న మోక్షజ్ఞ.. ఇప్పుడు కొత్త కథతో ప్రేక్షకుల ముందుకు వచ్చేందుకు సిద్ధమవుతున్నట్లు తెలుస్తోంది.
మోక్షజ్ఞ కోసం ప్రత్యేక కథ?
మోక్షజ్ఞ తొలి సినిమాను గ్రాండ్గా లాంచ్ చేసేందుకు దర్శకుడు వశిష్ట ఓ డిఫరెంట్ కాన్సెప్ట్ను సిద్ధం చేసినట్లు సమాచారం. కథ నచ్చడంతో బాలకృష్ణ కూడా ఈ ప్రాజెక్ట్కు అంగీకారం తెలిపినట్లు టాక్.
మోక్షజ్ఞ ఎంట్రీ సినిమాను భారీ స్థాయిలో రూపొందించేందుకు మేకర్స్ ప్లాన్ చేస్తున్నారని తెలుస్తోంది. ఈ ప్రాజెక్ట్కు సంబంధించిన మరిన్ని వివరాలను దసరా సందర్భంగా వెల్లడించే అవకాశమున్నట్లు సమాచారం.
బాలయ్య గాయం కారణంగా ఆలస్యం?
వాస్తవానికి మోక్షజ్ఞ సినిమాకు సంబంధించిన అధికారిక ప్రకటన ఇప్పటికే రావాల్సి ఉందని తెలుస్తోంది. అయితే ఇటీవల బాలకృష్ణ షూటింగ్ సమయంలో గాయపడటం, అనంతరం మోకాలికి శస్త్రచికిత్స చేయించుకోవడంతో అనౌన్స్మెంట్ వాయిదా పడినట్లు సమాచారం.
బాలయ్య పూర్తిగా కోలుకోవడానికి కొంత సమయం పట్టడంతో చిత్రబృందం కూడా అధికారిక ప్రకటనను వాయిదా వేసినట్లు తెలుస్తోంది. ప్రస్తుతం ఆయన ఆరోగ్యం మెరుగుపడటంతో పాటు పరిస్థితులు అనుకూలంగా ఉండటంతో.. రాబోయే దసరా సందర్భంగా మోక్షజ్ఞ తొలి చిత్రాన్ని లాంఛనంగా ప్రకటించేందుకు సన్నాహాలు జరుగుతున్నాయనే ప్రచారం ఊపందుకుంది.
ఈ వార్త నిజమైతే చాలా కాలంగా మోక్షజ్ఞ ఎంట్రీ కోసం ఎదురుచూస్తున్న నందమూరి అభిమానులకు దసరా పండగ మరింత ప్రత్యేకంగా మారనుంది. అయితే దర్శకుడు, సినిమా కథ, నిర్మాణ సంస్థ తదితర వివరాలపై అధికారిక ప్రకటన వచ్చే వరకు వేచి చూడాల్సిందే.