D International: నేరాలు, వీసా నిబంధనల ఉల్లంఘన, జాతీయ భద్రతకు ముప్పు వంటి కారణాలతో భారీగా వీసాల రద్దు, అమెరికా అధ్యక్షుడు డొనాల్డ్ ట్రంప్ ప్రభుత్వం వలసదారులపై కఠిన చర్యలను మరింత వేగవంతం చేస్తోంది. ఈ క్రమంలో ఇప్పటివరకు 1.75 లక్షలకు పైగా వీసాలను రద్దు చేసినట్లు అమెరికా విదేశాంగ శాఖ వెల్లడించింది. నిబంధనలు ఉల్లంఘించడం, నేరాలకు పాల్పడటం, మోసాలకు పాల్పడటం, జాతీయ భద్రతకు ముప్పుగా మారడం వంటి అంశాలను వీసాల రద్దుకు ప్రధాన కారణాలుగా పేర్కొంది.
నేరాలు, వీసా నిబంధనల ఉల్లంఘన
అమెరికా ప్రభుత్వం చేపట్టిన తనిఖీల్లో వీసా నిబంధనలను ఉల్లంఘించిన వారిపై కఠిన చర్యలు తీసుకుంటున్నారు. ముఖ్యంగా శారీరక దాడులు, మద్యం సేవించి వాహనం నడపడం (DUI), దొంగతనాలు, డ్రగ్స్‌కు సంబంధించిన నేరాలు వీసాల రద్దులో ప్రధానంగా ఉన్నాయి.
అదేవిధంగా అమెరికన్ పౌరులపై హింసను ప్రేరేపించడం, ఇమ్మిగ్రేషన్ వ్యవస్థను దుర్వినియోగం చేయడం, ఇతర చట్టవ్యతిరేక కార్యకలాపాలకు పాల్పడటం వంటి కారణాలతోనూ వీసాలు రద్దు చేస్తున్నారు.
తీవ్రమైన నేరాలపై ప్రత్యేక దృష్టి
అత్యాచారం, లైంగిక వేధింపులు, కిడ్నాప్, మానవ అక్రమ రవాణా, పిల్లలపై లైంగిక దాడులకు సంబంధించిన కేసుల్లో ఉన్న విదేశీయులపై ప్రభుత్వం కఠినంగా వ్యవహరిస్తోంది. ఇలాంటి కేసుల్లో పలువురి వీసాలను రద్దు చేసినట్లు విదేశాంగ శాఖ తెలిపింది.
అలాగే, పిల్లలకు అమెరికా పౌరసత్వం కల్పించాలనే ఉద్దేశంతో ‘బర్త్ టూరిజం’ ద్వారా దేశంలోకి వచ్చిన కొందరు విదేశీయుల వీసాలను కూడా అధికారులు రద్దు చేశారు.
సోషల్ మీడియా తనిఖీలపైనా విమర్శలు
ట్రంప్ ప్రభుత్వం అధికారంలోకి వచ్చిన తర్వాత ఇమ్మిగ్రేషన్ తనిఖీలు మరింత పెరిగాయి. చెల్లుబాటయ్యే వీసాలు ఉన్నప్పటికీ నిబంధనలు ఉల్లంఘించిన వారిపై చర్యలు తీసుకుంటున్నారు.
మరోవైపు, కొత్త వీసాల దరఖాస్తుల పరిశీలనలో సోషల్ మీడియా ఖాతాలను తనిఖీ చేసే విధానాన్ని కూడా అమెరికా ప్రభుత్వం కఠినతరం చేసింది. అయితే ఈ విధానంపై మానవ హక్కుల సంఘాలు ఆందోళన వ్యక్తం చేస్తున్నాయి. సోషల్ మీడియా కార్యకలాపాల ఆధారంగా వీసాలపై నిర్ణయాలు తీసుకోవడం భావప్రకటనా స్వేచ్ఛకు భంగం కలిగించే అవకాశం ఉందని అవి విమర్శిస్తున్నాయి.