D News: Jul 31: సీఎం రేవంత్ రెడ్డి: ప్రభుత్వ ఇంజినీరింగ్ కాలేజీల్లో చదువుతున్న విద్యార్థులకు ప్రముఖ కంపెనీల్లో ఇంటర్న్షిప్ అవకాశాలు కల్పించాలని ముఖ్యమంత్రి రేవంత్ రెడ్డి అధికారులను ఆదేశించారు. రాష్ట్రంలో నైపుణ్యాభివృద్ధి, యువత ఉపాధి అవకాశాలపై నిర్వహించిన సమీక్షా సమావేశంలో ఆయన పలు కీలక నిర్ణయాలు తీసుకున్నారు. విద్య పూర్తి చేసిన వెంటనే ఉద్యోగ అవకాశాలు లభించేలా విద్యార్థులకు పరిశ్రమల అవసరాలకు అనుగుణమైన ఆధునిక నైపుణ్యాలను అందించాలని సూచించారు.
రాష్ట్రంలో స్కిల్ డెవలప్మెంట్ను మరింత బలోపేతం చేసేందుకు స్కిల్ యూనివర్సిటీలో అత్యాధునిక రీసెర్చ్ సెంటర్ ఏర్పాటు చేయాలని సీఎం రేవంత్ రెడ్డి ఆదేశించారు. పరిశ్రమల అవసరాలకు అనుగుణంగా యువతను తీర్చిదిద్దడం, కొత్త సాంకేతిక పరిజ్ఞానంపై పరిశోధనలు నిర్వహించడం ఈ కేంద్రం ప్రధాన లక్ష్యంగా ఉండనుంది. దీని ద్వారా విద్యార్థులకు అత్యాధునిక శిక్షణ అందించడంతో పాటు ఉపాధి అవకాశాలు మరింత మెరుగుపడనున్నాయి.
ప్రభుత్వ ఐటీఐలను అడ్వాన్స్డ్ ట్రైనింగ్ సెంటర్లుగా (ATCs) అభివృద్ధి చేసి యువతకు ఉద్యోగోపయోగి కోర్సులు అందించాలని సీఎం సూచించారు. ఇందులో భాగంగా ఏటీసీల్లో ఎలక్ట్రిక్ వెహికల్ (EV), డ్రోన్ టెక్నాలజీ వంటి ఆధునిక కోర్సులను ప్రవేశపెట్టాలని అధికారులను ఆదేశించారు. మారుతున్న పరిశ్రమల అవసరాలకు అనుగుణంగా డిమాండ్ ఉన్న కోర్సులను అందుబాటులోకి తీసుకురావడం ద్వారా రాష్ట్ర యువతకు మరింత ఉపాధి అవకాశాలు కల్పించవచ్చని ఆయన అభిప్రాయపడ్డారు.