D Sports: Jul 18: జపాన్ ఓపెన్ 2026లో పీవీ సింధు చరిత్ర.. ఫైనల్కు చేరిన తొలి భారత మహిళా షట్లర్
భారత బ్యాడ్మింటన్ స్టార్, తెలుగు తేజం పీవీ సింధు ప్రతిష్టాత్మక జపాన్ ఓపెన్ సూపర్ 750 టోర్నీలో సరికొత్త చరిత్ర సృష్టించింది. ఈ టోర్నీ ఫైనల్కు చేరిన తొలి భారత మహిళా షట్లర్గా రికార్డు పుటల్లో తన పేరు నమోదు చేసుకుంది. శనివారం జరిగిన సెమీఫైనల్లో అద్భుత ప్రదర్శన కనబరిచిన సింధు టైటిల్ పోరుకు అర్హత సాధించింది.
మహిళల సింగిల్స్ సెమీఫైనల్లో సింధు చైనాకు చెందిన బలమైన ప్రత్యర్థి చెన్ యుఫీయ్తో తలపడింది. తొలి గేమ్ ఆరంభం నుంచి ఇరువురు షట్లర్లు హోరాహోరీగా పోటీపడగా, కీలక సమయంలో మెరుగైన ఆటతీరును ప్రదర్శించిన సింధు 21-19తో తొలి సెట్ను కైవసం చేసుకుంది.
రెండో సెట్లో కూడా సింధు పూర్తి ఆధిపత్యం చెలాయించింది. 15-10తో ఆధిక్యంలో ఉన్న సమయంలో ప్రత్యర్థి చెన్ యుఫీయ్ గాయంతో రిటైర్డ్ హర్ట్ ప్రకటించి మ్యాచ్ నుంచి తప్పుకుంది. దీంతో పీవీ సింధు విజేతగా నిలిచి జపాన్ ఓపెన్ ఫైనల్లో అడుగుపెట్టింది.
గత రెండేళ్లలో పీవీ సింధు ఒక అంతర్జాతీయ టోర్నీలో ఫైనల్కు చేరడం ఇదే తొలిసారి. చివరిసారిగా ఆమె 2024లో జరిగిన సయ్యద్ మోదీ ఇంటర్నేషనల్ టోర్నీలో టైటిల్ను కైవసం చేసుకుంది. ఇప్పుడు మరోసారి అంతర్జాతీయ వేదికపై టైటిల్కు చేరువ కావడం అభిమానుల్లో ఉత్సాహాన్ని నింపుతోంది.
ఆదివారం జరిగే గ్రాండ్ ఫైనల్లో సింధు ప్రత్యర్థి ఇంకా ఖరారు కాలేదు. రెండో సెమీఫైనల్లో తలపడనున్న అకనె యమగుచి (జపాన్), పుత్రి కుసుమ వర్దాని (ఇండోనేషియా) మధ్య జరిగే మ్యాచ్లో విజేతతో సింధు టైటిల్ కోసం పోటీ పడనుంది.
ఈ తుది పోరులోనూ విజయం సాధిస్తే జపాన్ ఓపెన్ టైటిల్ను గెలిచిన తొలి భారత మహిళా షట్లర్గా పీవీ సింధు మరో అరుదైన ఘనతను తన ఖాతాలో వేసుకోనుంది.