D Spiritual: Jul 17: పూరీ: ప్రపంచప్రసిద్ధ పూరీ జగన్నాథుడి రథయాత్ర ఉత్సవంలో ఈ ఏడాది విషాదం చోటుచేసుకుంది. రథయాత్ర సందర్భంగా జరిగిన తొక్కిసలాటలో ఒక భక్తుడు మృతి చెందగా, 130 మందికిపైగా గాయపడినట్లు అధికారులు తెలిపారు. మరీచకోట్ సమీపంలోని బోడా దండా ప్రాంతంలో ఈ ఘటన జరిగింది. భారీ వర్షం కురుస్తున్నప్పటికీ లక్షలాది మంది భక్తులు రథయాత్రను వీక్షించేందుకు తరలివచ్చారు.
ప్రత్యక్ష సాక్షుల కథనం ప్రకారం, రథాలు ముందుకు కదులుతున్న సమయంలో ఒక్కసారిగా భక్తులు రథాలవైపు దూసుకురావడంతో తీవ్ర తొక్కిసలాట ఏర్పడింది. ఒకరిపై ఒకరు పడిపోవడంతో పలువురికి ఊపిరాడక అస్వస్థతకు గురయ్యారు. వెంటనే వాలంటీర్లు, పోలీసులు, అత్యవసర వైద్య బృందాలు సహాయక చర్యలు చేపట్టి క్షతగాత్రులను సమీప ఆసుపత్రులకు తరలించారు.
ఈ ఘటనలో కటక్‌కు చెందిన అనిల్ దాస్ అనే భక్తుడు స్పృహ కోల్పోయి పూరీ జిల్లా ప్రధాన ఆసుపత్రికి తరలించగా, అప్పటికే ఆయన మృతి చెందినట్లు వైద్యులు నిర్ధారించారు. గాయపడిన వారిలో పలువురి పరిస్థితి విషమంగా ఉన్నట్లు సమాచారం. ఘటనకు గల ఖచ్చితమైన కారణాలపై పోలీసులు దర్యాప్తు కొనసాగిస్తున్నారు.
ఘటనా స్థలంలో పోలీసులు, అత్యవసర వైద్య సిబ్బంది పరిస్థితిని అదుపులోకి తీసుకురావడానికి చర్యలు చేపట్టారు. జగన్నాథుడు, బలభద్రుడు, సుభద్రాదేవి దివ్య రథయాత్రను వీక్షించేందుకు లక్షలాది మంది భక్తులు గుమిగూడిన సమయంలో ఈ ప్రమాదం జరగడం తీవ్ర విషాదాన్ని కలిగించింది.
ఇదిలా ఉండగా, భారత వాతావరణ శాఖ వివరాల ప్రకారం మంగళవారం నుంచి పూరీలో 233 మిల్లీమీటర్ల వర్షపాతం నమోదైంది. భారీ వర్షాల కారణంగా పలు ప్రాంతాల్లో నీరు నిలిచిపోవడంతో భక్తుల రాకపోకలకు ఇబ్బందులు తలెత్తాయి.
రథయాత్ర ఏర్పాట్లపై ముందస్తుగా సమీక్ష నిర్వహించిన ఒడిశా ముఖ్యమంత్రి మోహన్ చరణ్ మాఝీ, భక్తుల భద్రతకు అత్యంత ప్రాధాన్యత ఇవ్వాలని అధికారులను ఆదేశించారు. వర్షపు నీరు నిల్వ కాకుండా వెంటనే తొలగించేలా జిల్లా యంత్రాంగం, పురపాలక అధికారులు అప్రమత్తంగా ఉండాలని సూచించారు.
రథయాత్ర భద్రత కోసం పూరీలో 19 మంది ఐపీఎస్ అధికారులు, సుమారు 13 వేల మంది పోలీసు సిబ్బందిని మోహరించి బహుళ అంచెల భద్రతా ఏర్పాట్లు చేసినప్పటికీ ఈ ఘటన చోటుచేసుకోవడం ఆందోళన కలిగిస్తోంది. ఘటనపై అధికారులు సమగ్ర విచారణ చేపట్టగా, మరిన్ని వివరాలు తెలియాల్సి ఉంది.