D News: Jul 17: అమరావతి: ఆంధ్రప్రదేశ్లో కొవిడ్-19 కేసులు మరోసారి ఆందోళన కలిగిస్తున్నాయి. గత కొద్ది రోజులుగా రాష్ట్రంలో పాజిటివ్ కేసులు నమోదవుతుండటంతో ప్రజల్లో అప్రమత్తత పెరిగింది. తాజాగా రాష్ట్ర వైద్య ఆరోగ్య శాఖ విడుదల చేసిన వివరాల ప్రకారం, రాష్ట్రంలో మొత్తం 12 కొవిడ్ పాజిటివ్ కేసులు నమోదయ్యాయి. వీరిలో నలుగురు మృతి చెందినట్లు వైద్య ఆరోగ్య, కుటుంబ సంక్షేమ శాఖ కార్యదర్శి జి. వీరపాండియన్ వెల్లడించారు.
మృతుల్లో ముగ్గురు కడప జిల్లాకు చెందినవారు కాగా, ఒకరు కాకినాడ జిల్లాకు చెందిన వ్యక్తి. కొవిడ్ సోకిన ఈ నలుగురికి ఇప్పటికే తీవ్రమైన ఇతర అనారోగ్య సమస్యలు ఉన్నాయని అధికారులు తెలిపారు. అందువల్ల ప్రజలు అనవసరంగా భయపడాల్సిన అవసరం లేదని, అయితే తగిన జాగ్రత్తలు తప్పనిసరిగా పాటించాలని సూచించారు.
రాష్ట్రంలో నమోదైన 12 కేసుల్లో కడప జిల్లాలో అత్యధికంగా ఎనిమిది, గుంటూరు జిల్లాలో రెండు, విశాఖపట్నం మరియు కాకినాడ జిల్లాల్లో ఒక్కో కేసు నమోదైంది. పాజిటివ్గా తేలిన వారి సన్నిహితులను గుర్తించి పరీక్షలు నిర్వహిస్తున్నామని అధికారులు తెలిపారు. వైరస్ జన్యు స్వరూపాన్ని గుర్తించేందుకు ఐదు నమూనాలను పుణెలోని నేషనల్ ఇన్స్టిట్యూట్ ఆఫ్ వైరాలజీ (ఎన్ఐవీ)కు పంపినట్లు వెల్లడించారు.
జూన్ 26 నుంచి జులై 16 వరకు ఈ కేసులు నమోదయ్యాయి. మొత్తం 67 మంది నుంచి సేకరించిన నమూనాలను పరీక్షించగా, 11 మందికి రాష్ట్రంలో పాజిటివ్గా నిర్ధారణ అయింది. మరో కేసు కాకినాడ జిల్లాకు చెందిన వ్యక్తికి తమిళనాడులోని వేలూరు సీఎంసీ ఆసుపత్రిలో పరీక్షలు నిర్వహించగా బయటపడింది.
విశాఖపట్నంలో పాజిటివ్గా తేలిన వ్యక్తి ఇటీవల హైదరాబాద్కు వెళ్లి వచ్చినట్లు అధికారులు తెలిపారు. అనంతరం ఆయనకు జ్వరం, తలనొప్పి వంటి లక్షణాలు కనిపించడంతో ఆర్టీపీసీఆర్ పరీక్ష నిర్వహించగా కొవిడ్ నిర్ధారణ అయింది. ఆయన భార్యకు పరీక్షలు చేయగా నెగిటివ్ ఫలితం వచ్చింది.
ప్రస్తుతం పాజిటివ్గా ఉన్న వారిలో ముగ్గురు హోం ఐసోలేషన్లో ఉండగా, ఇద్దరు ఆసుపత్రిలో చికిత్స పొందుతున్నారు. మరో ముగ్గురు ఇప్పటికే కోలుకుని డిశ్చార్జ్ అయ్యారు. కేసులు వేర్వేరు జిల్లాల్లో నమోదవడం వల్ల పరిస్థితిని నిరంతరం పర్యవేక్షిస్తున్నామని వైద్య అధికారులు తెలిపారు.
కొవిడ్ పరిస్థితిని దృష్టిలో ఉంచుకుని రాష్ట్ర ప్రభుత్వం అన్ని జిల్లా వైద్య ఆరోగ్య అధికారులను, ప్రభుత్వ ఆసుపత్రులు, బోధనాసుపత్రుల సూపరింటెండెంట్లను అప్రమత్తం చేసింది. ఆర్టీపీసీఆర్ టెస్టింగ్ కిట్లు, వైరల్ ట్రాన్స్పోర్ట్ మీడియా (వీటీఎం), పీపీఈ కిట్లు, మాస్కులు, శానిటైజర్లు, ఆక్సిజన్, అవసరమైన మందులను సిద్ధంగా ఉంచాలని ఆదేశాలు జారీ చేసింది. అలాగే ఆసుపత్రుల్లో ప్రత్యేక కొవిడ్ వార్డులను ఏర్పాటు చేసి అవసరమైన వైద్య సదుపాయాలు కల్పిస్తోంది.
అధికారులు ప్రజలకు జ్వరం, దగ్గు, గొంతు నొప్పి వంటి అనుమానాస్పద లక్షణాలు కనిపిస్తే వెంటనే సమీప ఆసుపత్రిలో పరీక్షలు చేయించుకోవాలని సూచించారు. ముఖ్యంగా బీపీ, షుగర్, గుండె సంబంధిత వ్యాధులు వంటి దీర్ఘకాలిక ఆరోగ్య సమస్యలతో బాధపడుతున్న వారు మరింత అప్రమత్తంగా ఉండాలని వైద్య నిపుణులు సూచిస్తున్నారు. ప్రస్తుతం పరిస్థితి ఆందోళనకరంగా లేకపోయినా, వ్యక్తిగత పరిశుభ్రత, మాస్క్ వినియోగం, అవసరమైన జాగ్రత్తలు పాటించడం ద్వారా వైరస్ వ్యాప్తిని నివారించవచ్చని అధికారులు పేర్కొన్నారు.