ఏపీలో భూకంపం.. భయంతో ప్రజల పరుగులు

DNews: Feb19: ఆంధ్రప్రదేశ్‌లో మరోసారి భూకంపం కలకలం సృష్టించింది. గురువారం తెల్లవారుజామున పల్నాడు జిల్లాలో స్వల్పంగా భూమి కంపించడంతో స్థానిక ప్రజలు అకస్మాత్తుగా భయాందోళనకు గురయ్యారు. గాఢ నిద్రలో ఉన్నప్పుడు భూమి కంపించడంతో, ఇంట్లోని వస్తువులు కదిలిపోవడంతో ప్రజలు ఇళ్ల నుంచి బయటకు పరుగులు తీశారు. నేషనల్ సెంటర్ ఫర్ సీస్మోలజీ నివేదిక ప్రకారం, భూకంప తీవ్రత రిక్టర్ స్కేలుపై 3.5గా నమోదైంది. భూకంప కేంద్రం పల్నాడు జిల్లాలోని వినుకొండకు 20 కిలోమీటర్ల దూరంలో ఉన్నట్లు అధికారులు గుర్తించారు. దాదాపు 10 కిలోమీటర్ల లోతులో ప్రకంపనలు సంభవించాయి. దీని ప్రభావాలు వినుకొండతో పాటు ప్రకాశం జిల్లాలోని దర్శి మరియు చుట్టుపక్కల గ్రామాలలో స్పష్టంగా కనిపించాయి.

రాబోయే రోజుల్లో మరిన్ని భూకంపాలు సంభవించే అవకాశం ఉన్నందున ప్రజలు అప్రమత్తంగా ఉండాలని శాస్త్రవేత్తలు సూచిస్తున్నారు. కొన్ని నెలల క్రితం తెలంగాణలోని అనేక జిల్లాల్లో భూకంపాలు సంభవించిన విషయం తెలిసిందే. ప్లేట్ కదలికలు లేదా భూమి అంతర్భాగంలో స్థానిక భౌగోళిక మార్పుల కారణంగా దక్షిణ భారతదేశంలోని కొన్ని ప్రాంతాల్లో ఇటువంటి ప్రకంపనలు పెరుగుతున్నాయని విశ్లేషకులు భావిస్తున్నారు.