సంక్రాంతి పండుగ వచ్చిందంటే ప్రతి ఇంటి ముంగిట ముగ్గులతో కళకళలాడుతుంది. పురాతన కాలంలో గీతల ముగ్గులు, చుక్కల ముగ్గులు విరివిగా వేసేవారు. కాలం మారుతున్న కొద్దీ ముగ్గుల డిజైన్లు కూడా మారాయి. ప్రస్తుతం మెలికల ముగ్గులు, అందమైన బొమ్మలతో కూడిన కొత్త కొత్త డిజైన్ల ముగ్గులు ఎక్కువగా ప్రాచుర్యంలో ఉన్నాయి. చుక్కల ముగ్గులు ఇప్పుడు అరుదుగా మారాయి.
ముగ్గు మరింత నీట్గా, ఆకర్షణీయంగా కనిపించాలంటే రంగులు నింపిన తర్వాత ఆ డిజైన్పై నుంచి డబుల్ గీతలతో మరోసారి గీయాలి. ఇలా దిద్దిన తర్వాత ముగ్గు వేస్తే అది స్పష్టంగా, అందంగా కనిపిస్తుంది. ముగ్గు వేయడంలో శ్రద్ధ, శుభ్రత ఎంతో ముఖ్యమైనవి.
కనుమ రోజు రథం ముగ్గుకు ప్రత్యేకమైన ప్రాముఖ్యత ఉంది. ఈ రోజున రథం ముగ్గును ఎటు తిప్పి వేయాలనే సందేహం చాలా మందికి కలుగుతుంది. సంప్రదాయం ప్రకారం కనుమ రోజున రథం ముగ్గును ఇంటి ముంగట వాకిట్లో బయటికి తిప్పి వేయాలి.
దీనికి ఉన్న భావన ఏమిటంటే, కనుమ రోజున ఇంట్లోని కీడు రథం ద్వారా బయటికి వెళ్లిపోతుందని పూర్వికుల విశ్వాసం. పురాణ గాథల ప్రకారం శివుడు కనుమ రోజు రథాన్ని ఎక్కి మన ఇంటి వాకిటి నుంచి బయటికి వెళ్తాడని చెబుతారు.
అయితే సంక్రాంతి పండుగ రోజున రథం ముగ్గును దీనికి భిన్నంగా వేయాలి. ఈ రోజున రథం ముగ్గును ఇంటిలోకి ఆహ్వానిస్తున్నట్లుగా వేయడం ఆనవాయితీ. సంక్రాంతి రోజున ఇంట్లో పూజలు నిర్వహిస్తారు కాబట్టి, శివుడు రథంపై మన ఇంటికి వస్తాడని పూర్వికులు నమ్మారు.
సంక్రాంతి రోజున రథం ముగ్గును లోపలికి తిప్పి వేయడం వల్ల సిరిసంపదలు, భోగభాగ్యాలు, సుఖసంతోషాలు ఇంట్లోకి వస్తాయని విశ్వాసం. ఈ రథంపై సూర్యభగవానుడు వస్తాడని భావిస్తారు. అందువల్ల ఆరోగ్యం, శుభఫలితాలు కలుగుతాయని నమ్మకం.
కనుమ రోజున మళ్లీ రథం ముగ్గును బయటికి పంపినట్లుగా వేయాలి. దీనికి కారణం కనుమ రోజు మాంసాహార భోజనాలు చేసే ఆనవాయితీ ఉండటమే. ఆ రోజున శివుడు మరియు సూర్యుడు ఇంట్లో ఉండరాదని, వారు రథంపై తిరిగి బయటికి వెళ్లిపోతారని పురాణ విశ్వాసం.
ఈ విధంగా రథం ముగ్గును సరైన దిశలో వేయడం వల్ల కీడు దూరమై, శుభాలు కలుగుతాయని పూర్వికులు విశ్వసించారు. ఈ సంప్రదాయం నేటికీ కొనసాగుతుండటం మన సంస్కృతి, ఆచారాల గొప్పతనాన్ని చాటుతోంది.