టీచర్ రాక్షస దండనకు పదేళ్ల చిన్నారి బలి

D News: Sept 1: ఢిల్లీలో విషాదం.. పాఠశాలలో శిక్షతో 10 ఏళ్ల విద్యార్థిని మృతి?

దేశ రాజధాని ఢిల్లీలోని తూర్పు వినోద్ నగర్‌ సర్వోదయ కన్యా విద్యాలయంలో తీవ్ర విషాదకర ఘటన చోటుచేసుకుంది. పాఠశాలకు క్లాస్ పుస్తకం తీసుకురాలేదనే కారణంతో 10 ఏళ్ల విద్యార్థిని పింకీని ఉపాధ్యాయురాలు ఎండలో నిలబెట్టినట్లు కుటుంబ సభ్యులు ఆరోపించారు. ఈ ఘటన అనంతరం అస్వస్థతకు గురైన చిన్నారి ఆస్పత్రిలో చికిత్స పొందుతూ మృతి చెందడంతో తీవ్ర కలకలం రేగింది.

అసలు ఏం జరిగింది?

ఆగస్టు 27న పాఠశాలకు వెళ్లిన పింకీ.. క్లాస్ పుస్తకం తీసుకురాలేదని, ఉపాధ్యాయురాలు ఆమెను మైదానంలో తీవ్రమైన ఎండలో నిలబెట్టినట్లు సమాచారం. గంటల తరబడి ఎండలో ఉండటంతో చిన్నారి అస్వస్థతకు గురై స్పృహతప్పి పడిపోయినట్లు కుటుంబ సభ్యులు తెలిపారు.

మధ్యాహ్నం సమయంలో పాఠశాల యాజమాన్యం నుంచి ఫోన్ రావడంతో పింకీ తల్లి అంజలి వెంటనే స్కూల్‌కు చేరుకున్నారు. అప్పటికే చిన్నారి తీవ్ర అస్వస్థతతో కనిపించడంతో ఆమెను ఆస్పత్రికి తరలించారు. పరిస్థితి విషమంగా ఉండటంతో చికిత్స పొందుతూ పింకీ మృతి చెందినట్లు కుటుంబ సభ్యులు తెలిపారు.

ఉపాధ్యాయురాలిపై చర్యలు

తమ కుమార్తె మృతికి ఉపాధ్యాయురాలి నిర్లక్ష్యమే కారణమని ఆరోపిస్తూ కుటుంబ సభ్యులు ఆందోళన వ్యక్తం చేశారు. ఈ ఘటనపై ఢిల్లీ ప్రభుత్వం స్పందించి విచారణకు ఆదేశించినట్లు సమాచారం. నిష్పాక్షిక విచారణ కోసం సంబంధిత ఉపాధ్యాయురాలిని బదిలీ చేసినట్లు అధికారులు తెలిపారు.

పాఠశాలల్లో విద్యార్థులకు శిక్ష విధించే విషయంలో నిబంధనలు కచ్చితంగా పాటించాలని ప్రజాసంఘాలు డిమాండ్ చేస్తున్నాయి. పిల్లలపై పరిమితికి మించిన శిక్షలు విధించే వారిపై కఠిన చర్యలు తీసుకోవడంతో పాటు, ఘటనకు బాధ్యులైన వారిపై చట్టపరమైన చర్యలు చేపట్టాలని కోరుతున్నాయి.