భారత క్రికెట్లో విరాట్ కోహ్లీకి ప్రత్యేక స్థానం ఉంది. పరుగుల యంత్రంగా, ఛేజింగ్లో తిరుగులేని బ్యాటర్గా, అద్భుతమైన ఫిట్నెస్కు ప్రతీకగా కోహ్లీ ప్రపంచ క్రికెట్లో తనకంటూ ప్రత్యేక గుర్తింపు తెచ్చుకున్నాడు. మూడు ఫార్మాట్లలోనూ భారత జట్టుకు ఎన్నో చిరస్మరణీయ విజయాలను అందించిన కోహ్లీ.. తన కెరీర్లో ఎన్నో అరుదైన రికార్డులను సొంతం చేసుకున్నాడు.
‘చీకూ’, ‘ఛేజ్ మాస్టర్’, ‘కింగ్’ వంటి పేర్లతో అభిమానుల నుంచి ప్రశంసలు అందుకున్న కోహ్లీ అంతర్జాతీయ క్రికెట్లో సాధించిన కొన్ని ముఖ్యమైన రికార్డులు ఇవే.
వన్డేల్లో 50కి పైగా సెంచరీలు:
వన్డే క్రికెట్లో 50కిపైగా సెంచరీలు సాధించిన తొలి బ్యాటర్గా విరాట్ కోహ్లీ రికార్డు సృష్టించాడు. అతడి ఖాతాలో ప్రస్తుతం 54 వన్డే సెంచరీలు ఉన్నాయి.
ఛేజింగ్లో అత్యధిక సెంచరీలు:
వన్డేల్లో లక్ష్య ఛేదన సమయంలో కోహ్లీ 29 సెంచరీలు సాధించాడు. ఇందులో 24 సెంచరీలు భారత్ విజయాల్లో నమోదయ్యాయి.
టెస్టు కెప్టెన్గా అత్యధిక విజయాలు:
భారత టెస్టు కెప్టెన్గా విరాట్ కోహ్లీ 40 విజయాలు అందించాడు. ఈ విషయంలో భారత కెప్టెన్లలో కోహ్లీదే అగ్రస్థానం.
ఒకే ప్రపంచకప్లో అత్యధిక పరుగులు:
2023 వన్డే ప్రపంచకప్లో కోహ్లీ 765 పరుగులు చేశాడు. ఒకే ప్రపంచకప్ ఎడిషన్లో అత్యధిక పరుగులు చేసిన బ్యాటర్గా రికార్డు సాధించాడు.
వన్డేల్లో వేగంగా పరుగుల మైలురాళ్లు:
8,000 నుంచి 14,000 వరకు వన్డే పరుగుల పలు మైలురాళ్లను అత్యంత వేగంగా చేరుకున్న బ్యాటర్గా కోహ్లీ అనేక రికార్డులు నెలకొల్పాడు.
టెస్టు కెప్టెన్గా ఏడు డబుల్ సెంచరీలు:
టెస్టు కెప్టెన్గా ఏడు డబుల్ సెంచరీలు చేసిన ఏకైక భారత ఆటగాడిగా విరాట్ కోహ్లీ నిలిచాడు.
అత్యధిక ప్లేయర్ ఆఫ్ ది మ్యాచ్ అవార్డులు:
అంతర్జాతీయ క్రికెట్లో 71 ప్లేయర్ ఆఫ్ ది మ్యాచ్ అవార్డులు అందుకున్న కోహ్లీ.. ఆల్టైమ్ జాబితాలో సచిన్ టెండూల్కర్ తర్వాతి స్థానంలో ఉన్నాడు.
అత్యధిక ప్లేయర్ ఆఫ్ ది సిరీస్ అవార్డులు:
అంతర్జాతీయ క్రికెట్లో 22 ప్లేయర్ ఆఫ్ ది సిరీస్ అవార్డులు గెలుచుకున్న ఆటగాడిగా కోహ్లీ అరుదైన ఘనతను సాధించాడు.
ఒకే జట్టుపై అత్యధిక వన్డే సెంచరీలు:
శ్రీలంకపై వన్డేల్లో కోహ్లీ 10 సెంచరీలు చేశాడు. ఒకే ప్రత్యర్థిపై అత్యధిక వన్డే శతకాలు సాధించిన బ్యాటర్లలో కోహ్లీ ముందంజలో ఉన్నాడు.
ఒక దశాబ్దంలో 20,000కిపైగా అంతర్జాతీయ పరుగులు:
2011 నుంచి 2020 మధ్య ఒక దశాబ్దంలో 20,000కిపైగా అంతర్జాతీయ పరుగులు చేసిన ఏకైక క్రికెటర్గా విరాట్ కోహ్లీ రికార్డు సృష్టించాడు.
రికార్డులు, అవార్డులతో పాటు ఒత్తిడిలోనూ జట్టుకు అండగా నిలిచి మ్యాచ్లను గెలిపించడం కోహ్లీ ప్రత్యేకత. అందుకే భారత క్రికెట్లోనే కాకుండా ప్రపంచ క్రికెట్లోనూ ‘కింగ్ కోహ్లీ’గా అతడి పేరు ప్రత్యేకంగా నిలిచిపోయింది.