DTech 18 Sep: వైర్లెస్ కనెక్టివిటీ భవిష్యత్తు దిశగా ఓ కీలక ముందడుగుగా, పరిశోధకుల బృందం ప్రపంచంలోనే మొట్టమొదటి “ఆల్-ఫ్రీక్వెన్సీ” 6G చిప్సెట్ను అభివృద్ధి చేసింది. ఇది Nature జర్నల్లో ప్రచురితమైన పరిశోధనా పత్రంలో వివరించబడింది. ఈ వినూత్న మొబైల్ ప్లాట్ఫాం, తదుపరి తరం టెలికమ్యూనికేషన్కు బలమైన అడుగుగా నిలుస్తుంది.
11 x 1.7 మిల్లీమీటర్ల పరిమాణంలో ఉండే ఈ చిప్సెట్, 0.5 GHz నుండి 115 GHz వరకు విస్తృత స్పెక్ట్రంలో పనిచేసేలా రూపొందించబడింది. ఇది ప్రస్తుతం ఉన్న సాంకేతిక పరిమితులను అధిగమించి, బహుళ ప్రత్యేక రేడియో వ్యవస్థల అవసరాన్ని తొలగిస్తుంది. పరిశోధకుల ప్రకారం, ఈ చిప్ 100 Gbps కంటే అధిక స్పీడ్ను అందించగలదు — ఇది 5G సాంకేతికత సిధ్ధాంత పరంగా అందించే గరిష్ఠ వేగం కంటే దాదాపు పది రెట్లు అధికం.
కొత్త పదార్థంతో కొత్త వ్యవస్థ
ఈ టెక్నాలజీ వెనుక అసలైన కీలకం — థిన్ ఫిల్మ్ లిథియం నియోబేట్ (TFLN) అనే కొత్త పదార్థం వాడకమే. చైనాలోని పెకింగ్ విశ్వవిద్యాలయం మరియు హాంకాంగ్ సిటీ యూనివర్సిటీకి చెందిన పరిశోధకులు ఈ పదార్థంతో కాంతి మరియు విద్యుత్ సిగ్నల్స్ను అనుసంధానిస్తూ స్థిరమైన సంకేతాలను సృష్టించే ఫోటోనిక్ వైర్లెస్ వ్యవస్థను రూపొందించారు.
ఈ వ్యవస్థ, వైర్లెస్ సిగ్నల్స్ను ఆప్టికల్ తరంగాలుగా మార్చడానికి బ్రాడ్బ్యాండ్ ఎలక్ట్రో-ఆప్టిక్ మాడ్యులేటర్ను ఉపయోగిస్తుంది. ఆ తరంగాలను ఆప్టోఎలక్ట్రానిక్ ఓసిలేటర్లు ద్వారా పంపి కావలసిన రేడియో తరంగాలను ఉత్పత్తి చేస్తారు. ఈ విధానం చిప్ను సులభంగా పునర్నిర్మించదగినదిగా చేస్తుంది. అలాగే, స్పెక్ట్రం మార్పులకు అనుగుణంగా ఒక్క హార్డ్వేర్తోనే పూర్తి ఫ్రీక్వెన్సీ రేంజ్ను కవర్ చేయగలదు. అంతర్గత పరీక్షల్లో, ఈ చిప్ 200 మైక్రోసెకన్లలోపు 6 GHz ఫ్రీక్వెన్సీకి ట్యూన్ చేయగలిగినట్లు వెల్లడైంది.
6G కి మార్గం
ఈ అభివృద్ధి 6G వైపు ఒక అద్భుతమైన అడుగు అయినప్పటికీ, ఇది పూర్తి స్థాయి 6G నెట్వర్క్ రూపుదిద్దుకునే ప్రక్రియలో ఒక భాగం మాత్రమే. పూర్తి స్థాయి 6G కోసం మౌలిక సదుపాయాలు, నెట్వర్క్ ప్రమాణాలు, మరియు వాటికి అనుగుణంగా పనిచేసే పరికరాల అభివృద్ధిలో గణనీయమైన పురోగతులు అవసరం.
ఇటీవలి ఈ పరిశోధన, అల్ట్రా-హై-స్పీడ్ కనెక్టివిటీ, అల్ట్రా-లో లేటెన్సీ, రియల్ టైమ్ నెట్వర్క్ ఆప్టిమైజేషన్ వంటి లక్షణాలను కలిగిన 6G వైర్లెస్ టెక్నాలజీకి మార్గం సుగమం చేస్తోంది. ముఖ్యంగా, 6G దృష్టి కేవలం వేగవంతమైన ఇంటర్నెట్పైనే కాకుండా, అన్ని పరికరాలను కలిపే ఇంటర్నెట్ ఆఫ్ ఎవ్రీథింగ్ను సాధించేందుకు ‘వితరణీయ న్యూరల్ నెట్వర్క్’ నిర్మాణంపై ఉంది.