DNews:20 OCT:బీజింగ్: టెక్నాలజీ ఎక్కడికి చేరుతుందో, ఎప్పుడు మనిషి పనిని భర్తీ చేస్తుందో అర్థం కావడం లేదు. చైనాలో ఇప్పుడు రోబోలు కూలీల పనిని కూడా చేపట్టాయి. చాంగ్కింగ్ సిటీ కాలేజ్ ఆఫ్ సైన్స్ అండ్ టెక్నాలజీ విద్యార్థులు రూపొందించిన “కూలీ రోబోలు” ఇప్పుడు సోషల్ మీడియాలో వైరల్ అవుతున్నాయి. ఈ రోబోలు బస్టాండ్లు, రైల్వే స్టేషన్లలో లగేజీ మోయగల సామర్థ్యంతో అద్భుతంగా పనిచేస్తున్నాయి.
సోషల్ మీడియాలో “కూలీ రోబోలు” అనే పేరుతో పాపులర్ అవుతున్న ఈ రోబోలు, మనిషిలా లగేజీని మోసుకుంటూ నడుస్తాయి. కొన్నింటి వీపుపై బ్యాగ్లు తగిలించి, చేతుల్లో సూట్కేస్లతో నడుస్తున్న వీడియోలు ఇప్పుడు వైరల్. చిన్న రోబో 30 కిలోల వరకు, పెద్ద వాకింగ్ రోబో 60 కిలోల వరకు బరువును మోయగలదని చెబుతున్నారు.
ఈ రోబోలు మెట్లు ఎక్కగలవు, దిగగలవు కూడా. పరీక్షల దశలో ఉన్నప్పటికీ చైనాలో విజయవంతంగా పనిచేస్తున్నాయంట. రాబోయే రోజుల్లో బస్టాండ్లు, రైల్వే స్టేషన్లలో వీటిని ఉపయోగించే ప్రణాళికలో ఉన్నారని సమాచారం.
ఇదిలా ఉంటే, టెక్నాలజీ ఈ కొత్త అడుగు కొందరిని ఆశ్చర్యానికి గురి చేస్తుంటే, మరికొందరిని భయపెడుతోంది. ఎందుకంటే, ఇప్పటికే అనేక రంగాల్లో రోబోలు మనుషుల స్థానాన్ని తీసుకుంటున్నాయి. ఇలాంటి కూలీ రోబోలు వస్తే, స్టేషన్లు, బస్టాండ్ల్లో కూలీల ఉపాధి పరిస్థితి ఏంటన్నదే ఇప్పుడు చర్చనీయాంశంగా మారింది.
👉 ముఖ్యాంశాలు:
- చైనాలో విద్యార్థులు రూపొందించిన “కూలీ రోబోలు” వైరల్
- 30 నుండి 60 కిలోల వరకు లగేజీ మోయగల సామర్థ్యం
- బస్టాండ్లు, రైల్వే స్టేషన్లలో ప్రయాణికులకు సాయం
- టెక్నాలజీ అభివృద్ధి పై కొత్త చర్చ: “ఉద్యోగాలు సృష్టిస్తుందా లేక తీసేస్తుందా?”