D Spiritual: Jun 29: ప్రముఖ రిలయన్స్ ఇండస్ట్రీస్ అధినేత ముఖేష్ అంబానీ కుమారుడు అనంత్ అంబానీ ఆదివారం తెల్లవారుజామున తిరుమల శ్రీవేంకటేశ్వర స్వామివారిని దర్శించుకున్నారు. ఈ సందర్భంగా ఆలయ అధికారులు ఆయనకు ఘన స్వాగతం పలికి, ప్రత్యేక దర్శన ఏర్పాట్లు చేశారు.
శ్రీవారి దర్శనానికి ముందు అనంత్ అంబానీ సంప్రదాయం ప్రకారం స్వామివారికి తలనీలాలు సమర్పించారు. అనంతరం ఆలయంలో నిర్వహించిన ప్రత్యేక సేవల్లో పాల్గొని మూలవిరాట్టును దర్శించుకున్నారు. దర్శనం అనంతరం వేదపండితులు వేదాశీర్వచనం అందించగా, ఆలయ అధికారులు స్వామివారి తీర్థప్రసాదాలను అందజేసి సత్కరించారు.
ఈ సందర్భంగా తిరుమల తిరుపతి దేవస్థానం (టీటీడీ) గోశాల అభివృద్ధిపై కూడా చర్చ జరిగింది. గుజరాత్లోని జామ్నగర్లో రిలయన్స్ సంస్థ ప్రతిష్ఠాత్మకంగా నిర్వహిస్తున్న ‘వంతారా’ జంతు సంరక్షణ కేంద్రం తరహాలోనే తిరుమల టీటీడీ గోశాలను ఆధునిక సౌకర్యాలతో పూర్తిస్థాయిలో అభివృద్ధి చేసేందుకు అనంత్ అంబానీ సానుకూలంగా స్పందించినట్లు అధికారులు తెలిపారు.
తిరుమలలో పర్యావరణ పరిరక్షణతో పాటు భక్తులకు మెరుగైన రవాణా సౌకర్యాలు కల్పించే లక్ష్యంతో టీటీడీకి రూ.27.5 కోట్ల విలువైన 25 అత్యాధునిక ఎలక్ట్రిక్ బస్సులను విరాళంగా అందజేస్తామని అనంత్ అంబానీ ప్రకటించారు. టీటీడీ అదనపు ఈవో వెంకయ్య చౌదరి చేసిన విజ్ఞప్తికి స్పందించిన ఆయన, ఈ బస్సుల నిర్వహణకు అవసరమైన 50 మంది డ్రైవర్ల జీతభత్యాలను కూడా రిలయన్స్ సంస్థే భరిస్తుందని తెలిపారు.
అంతేకాకుండా, తిరుమల కొండపై ఎలక్ట్రిక్ వాహనాల వినియోగాన్ని ప్రోత్సహించేలా ప్రత్యేక ఈవీ ఛార్జింగ్ స్టేషన్లను కూడా ఏర్పాటు చేస్తామని అనంత్ అంబానీ హామీ ఇచ్చారు. ఈ చర్యలతో తిరుమలలో పర్యావరణహిత రవాణా వ్యవస్థ మరింత బలోపేతం అవుతుందని టీటీడీ అధికారులు ఆశాభావం వ్యక్తం చేశారు.