D Spiritual: Sept 9: వినాయక చవితి వేళ గణేశ్ మండపాలకు తాత్కాలిక విద్యుత్ కనెక్షన్లు తప్పనిసరి
ఆంధ్రప్రదేశ్లో వినాయక చవితి వేడుకల సందర్భంగా ఏర్పాటు చేసే గణేశ్ మండపాలకు తాత్కాలిక విద్యుత్ కనెక్షన్లు తీసుకోవడం తప్పనిసరి అని ఏపీసీపీడీసీఎల్ (APCPDCL) సీఎండీ పి. పుల్లారెడ్డి స్పష్టం చేశారు. ఉత్సవాల సమయంలో విద్యుత్ ప్రమాదాలను నివారించి, నిర్వాహకులు భద్రతా ప్రమాణాలను పాటించేలా ఈ నిర్ణయం తీసుకున్నట్లు ఆయన తెలిపారు.
గణేశ్ మండపాలకు తాత్కాలిక విద్యుత్ సరఫరా పొందాలనుకునే ఉత్సవ నిర్వాహకులు స్వర్ణ గ్రామం/సచివాలయాలు, మీ-సేవ కేంద్రాలు లేదా ఏపీసీపీడీసీఎల్ అధికారిక వెబ్సైట్ ద్వారా ఆన్లైన్లో దరఖాస్తు చేసుకోవచ్చని అధికారులు తెలిపారు. ఈ తాత్కాలిక విద్యుత్ సరఫరా సెప్టెంబర్ 26, 2026 వరకు అందుబాటులో ఉంటుందని సంస్థ పేర్కొంది.
తాత్కాలిక విద్యుత్ కనెక్షన్లకు రుసుములు
తాత్కాలిక విద్యుత్ కనెక్షన్ల కోసం విద్యుత్ సంస్థ నిర్దిష్ట ఛార్జీలను నిర్ణయించింది. 500 వాట్ల లోడ్ వరకు రూ.1,000, 1,000 వాట్ల (1 కిలోవాట్) లోడ్ వరకు రూ.2,250 నికర రుసుము చెల్లించాలి. వీటికి అదనంగా రూ.100 దరఖాస్తు ఫీజు చెల్లించాల్సి ఉంటుంది.
అక్రమ విద్యుత్ కనెక్షన్లపై కఠిన చర్యలు
తాత్కాలిక కనెక్షన్ కోసం దరఖాస్తు చేసుకోకుండా విద్యుత్ వైర్లకు నేరుగా లంకెలు వేసి అక్రమంగా విద్యుత్ వినియోగిస్తే కఠిన చర్యలు తీసుకుంటామని సీఎండీ హెచ్చరించారు. అక్రమ విద్యుత్ వినియోగానికి పాల్పడే వారిపై చట్టపరమైన కేసులు నమోదు చేస్తామని స్పష్టం చేశారు.
అర్హత కలిగిన ఎలక్ట్రీషియన్లతోనే వైరింగ్
గణేశ్ మండపాల వద్ద విద్యుత్ ప్రమాదాలు జరగకుండా ఉత్సవ కమిటీలు ప్రత్యేక జాగ్రత్తలు తీసుకోవాలని అధికారులు సూచించారు. మండపాల్లో విద్యుత్ వైరింగ్ పనులను అర్హత కలిగిన ఎలక్ట్రీషియన్లతోనే చేయించాలని సూచించారు. భద్రతా నిబంధనలు పాటిస్తూ వినాయక చవితి వేడుకలను ప్రశాంతంగా నిర్వహించాలని నిర్వాహకులకు సూచించారు.