అంతర్జాతీయ క్రికెట్‌ మండలి (ICC) తాజాగా ప్రకటించిన ప్లేయర్‌ ర్యాంకింగ్స్‌లో పలువురు స్టార్‌ ఆటగాళ్లు తమ స్థానాలను నిలబెట్టుకున్నారు. ముఖ్యంగా టీ20, వన్డే ఫార్మాట్లలో బ్యాటింగ్‌, బౌలింగ్‌, ఆల్‌రౌండర్‌ విభాగాల్లో ఆసక్తికరమైన మార్పులు చోటుచేసుకున్నాయి. భారత ఆటగాళ్లు కూడా పలు విభాగాల్లో మెరుగైన స్థానాల్లో కొనసాగుతున్నారు.
టీ20 బ్యాటింగ్‌లో ఇషాన్‌ కిషన్‌ నంబర్‌ వన్‌
టీ20 బ్యాటింగ్‌ ర్యాంకింగ్స్‌లో భారత ఆటగాడు ఇషాన్‌ కిషన్‌ 904 రేటింగ్‌ పాయింట్లతో అగ్రస్థానాన్ని కొనసాగిస్తున్నాడు. మరో భారత యువ బ్యాటర్‌ అభిషేక్‌ శర్మ 893 పాయింట్లతో రెండో స్థానంలో ఉన్నాడు. పాకిస్థాన్‌కు చెందిన సాహిబ్జాదా ఫర్హాన్‌ మూడో స్థానాన్ని దక్కించుకున్నాడు.
టీ20 బౌలింగ్‌లో అబ్రార్‌ అహ్మద్‌ పైకి..
టీ20 బౌలర్ల ర్యాంకింగ్స్‌లో పాకిస్థాన్‌ స్పిన్నర్‌ అబ్రార్‌ అహ్మద్‌ 736 రేటింగ్‌ పాయింట్లతో నంబర్‌ వన్‌ స్థానానికి చేరుకున్నాడు. దీంతో ఇప్పటివరకు అగ్రస్థానంలో ఉన్న అఫ్గానిస్థాన్‌ స్టార్‌ స్పిన్నర్‌ రషీద్‌ ఖాన్‌ రెండో స్థానానికి పరిమితమయ్యాడు. ఆస్ట్రేలియా స్పిన్నర్‌ ఆడమ్‌ జంపా మూడో స్థానంలో కొనసాగుతున్నాడు.
భారత బౌలర్ల విషయానికి వస్తే వరుణ్‌ చక్రవర్తి ఏడో స్థానంలో ఉండగా.. జస్ప్రీత్‌ బుమ్రా టాప్‌-10లో చోటు దక్కించుకుని పదో స్థానంలో నిలిచాడు.
టీ20 ఆల్‌రౌండర్లలో సికందర్‌ రజా ఆధిపత్యం
టీ20 ఆల్‌రౌండర్ల ర్యాంకింగ్స్‌లో జింబాబ్వే స్టార్‌ సికందర్‌ రజా 321 రేటింగ్‌ పాయింట్లతో అగ్రస్థానంలో కొనసాగుతున్నాడు. పాకిస్థాన్‌ ఆటగాడు సాయిమ్‌ అయూబ్‌ రెండో స్థానంలో ఉండగా.. ఇంగ్లాండ్‌కు చెందిన విల్‌ జాక్స్‌ మూడో స్థానాన్ని దక్కించుకున్నాడు. భారత స్టార్‌ ఆల్‌రౌండర్‌ హార్దిక్ పాండ్యా ఏడో స్థానంలో ఉన్నాడు.
వన్డే ఆల్‌రౌండర్లలో అజ్మతుల్లా ఒమర్జాయ్‌ టాప్‌
వన్డే ఆల్‌రౌండర్ల జాబితాలో అఫ్గానిస్థాన్‌ ఆటగాడు అజ్మతుల్లా ఒమర్జాయ్‌ 337 రేటింగ్‌ పాయింట్లతో మొదటి స్థానంలో నిలిచాడు. సికందర్‌ రజా రెండో స్థానంలో ఉండగా.. బంగ్లాదేశ్‌ స్టార్‌ మెహిదీ హసన్‌ మిరాజ్‌ మూడో స్థానాన్ని ఆక్రమించాడు. భారత్‌కు చెందిన అక్షర్‌ పటేల్‌ తొమ్మిదో స్థానంలో కొనసాగుతున్నాడు.
తాజా ర్యాంకింగ్స్‌లో స్టార్‌ ఆటగాళ్ల మధ్య స్వల్ప తేడాలతో కొనసాగుతున్న పోటీ.. రాబోయే మ్యాచ్‌లతో మరింత ఆసక్తికరంగా మారే అవకాశం ఉంది.