D News: రణ్‌వీర్ సింగ్ ప్రస్తుతం వరుస సినిమాలతో బిజీగా ఉన్నాడు. ‘ధురందర్’, ‘ధురందర్: ది రివెంజ్’ తర్వాత ఇప్పుడు మరో డిఫరెంట్ జానర్‌ను ఎంచుకున్నాడు. జాంబీ, పోస్ట్ అపోకలిప్టిక్ సర్వైవల్ థ్రిల్లర్‌గా తెరకెక్కుతున్న ‘ప్రళయ్’పై ఇప్పటికే భారీ అంచనాలు ఉన్నాయి.
ఈ సినిమా ప్రస్తుతం షూటింగ్ దశలో ఉంది. అయితే మేకర్స్ అధికారికంగా ఫస్ట్ లుక్ విడుదల చేయకముందే.. షూటింగ్ స్పాట్ నుంచి కొన్ని ఫొటోలు, వీడియోలు సోషల్ మీడియాలో లీక్ అయినట్లు తెలుస్తోంది. దీంతో రణ్‌వీర్ కొత్త లుక్ ఒక్కసారిగా వైరల్‌గా మారింది.
లీకైన వీడియోలో రణ్‌వీర్ ఇలా..
సోషల్ మీడియాలో వైరల్ అవుతున్న ఓ వీడియోలో రణ్‌వీర్ సింగ్ ఓ చిన్నారిని తన వీపుపై మోసుకుంటూ కనిపించాడు. చుట్టూ ఏదో విపత్కర పరిస్థితి నెలకొన్నట్లు ఆ వీడియోలో కనిపిస్తోంది.
అతడి పక్కనే మలయాళ నటి కళ్యాణి ప్రియదర్శన్ కూడా కనిపించింది. బ్రౌన్ ట్యాంక్ టాప్, గ్రీన్ ప్యాంట్‌లో ఆమె కనిపించింది. రణ్‌వీర్ మాత్రం పొడవాటి జుట్టు, గడ్డంతో పూర్తిగా రగ్గడ్ లుక్‌లో దర్శనమిచ్చాడు.ఈ లుక్ చూసిన అభిమానులు వెంటనే ‘ధురందర్’లోని రణ్‌వీర్ పాత్ర హమ్జాను గుర్తు చేసుకుంటున్నారు. మరోవైపు జాంబీలను పోలిన వ్యక్తుల మధ్య రణ్‌వీర్ యాక్షన్ మోడ్‌లో ఉన్నట్లు కనిపిస్తున్న మరో ఫొటో కూడా వైరల్ అవుతోంది.
ముంబై నగరమే కథకు కీలకం?
‘ప్రళయ్’ కథకు సంబంధించిన పూర్తి వివరాలను మేకర్స్ ఇప్పటివరకు బయటపెట్టలేదు. అయితే అందుతున్న సమాచారం ప్రకారం.. ఓ భయంకరమైన మహమ్మారి తర్వాత ముంబై నగరం పూర్తిగా మారిపోయే నేపథ్యంలో కథ సాగుతుందని టాక్.సాధారణ జీవితం పూర్తిగా కుప్పకూలిన తర్వాత.. ప్రాణాలతో మిగిలిన కొంతమంది వ్యక్తులు ఎదుర్కొనే పరిస్థితులే కథలో ప్రధానంగా ఉండనున్నట్లు తెలుస్తోంది. జాంబీలతో పాటు సర్వైవల్ అంశాలు సినిమాకు కీలకంగా ఉండే అవకాశం ఉంది.
అయితే ఇవన్నీ ప్రస్తుతం అందుతున్న సమాచారం మాత్రమే. సినిమా అధికారిక కథాంశాన్ని మేకర్స్ ఇంకా ప్రకటించాల్సి ఉంది.
రూ.300 కోట్ల బడ్జెట్ అంటూ ప్రచారం
‘ప్రళయ్’ను భారీ స్థాయిలో తెరకెక్కిస్తున్నట్లు ఇప్పటికే వార్తలు వచ్చాయి. ఈ సినిమా కోసం దాదాపు రూ.300 కోట్ల బడ్జెట్ కేటాయించినట్లు రిపోర్టులు ఉన్నాయి.అదే నిజమైతే రణ్‌వీర్ సింగ్ కెరీర్‌లోనే ఇది అత్యంత భారీ బడ్జెట్ చిత్రాల్లో ఒకటిగా నిలిచే అవకాశం ఉంది.ముంబైలోనే ఎక్కువ భాగం షూటింగ్ చేస్తున్నట్లు తెలుస్తోంది. సినిమా ప్రపంచాన్ని మరింత సహజంగా చూపించేందుకు రియల్ లొకేషన్స్‌తో పాటు భారీ సెట్స్‌ను కూడా ఉపయోగిస్తున్నట్లు సమాచారం.
రణ్‌వీర్‌కు జోడీగా కళ్యాణి
కళ్యాణి ప్రియదర్శన్ ఈ సినిమాలో కీలక పాత్ర పోషిస్తోంది. ‘లొకః చాప్టర్ 1’తో ప్రేక్షకులకు మరింత దగ్గరైన ఆమె.. ఇప్పుడు రణ్‌వీర్‌తో కలిసి నటిస్తోంది.ఆగస్టులో ముంబైలో షూటింగ్ ప్రారంభమైన ఈ సినిమా ప్రస్తుతం నిర్మాణ దశలోనే ఉంది. అయితే విడుదల తేదీని మాత్రం మేకర్స్ ఇంకా ప్రకటించలేదు.
మొత్తానికి ‘ప్రళయ్’ నుంచి అధికారిక ఫస్ట్ లుక్ కూడా రాకముందే లీకైన ఫొటోలు, వీడియోలు సినిమాపై ఆసక్తిని పెంచుతున్నాయి. ‘ధురందర్’లో రఫ్ అండ్ రగ్గడ్ లుక్‌లో ఆకట్టుకున్న రణ్‌వీర్.. ఇప్పుడు జాంబీల మధ్య సర్వైవల్ కోసం పోరాడే పాత్రలో ఎలా కనిపించనున్నాడు? అనేది ఆసక్తికరంగా మారింది.
ఫస్ట్ లుక్, టీజర్ విడుదలైన తర్వాత సినిమాకు సంబంధించిన కథ, రణ్‌వీర్ పాత్రపై మరింత క్లారిటీ వచ్చే అవకాశం ఉంది.