తెలంగాణలో ఏఈఈ ఉద్యోగాల కోసం ఎదురుచూస్తున్న అభ్యర్థులకు కీలక అప్డేట్ వచ్చింది. రవాణా, రోడ్లు, భవనాల శాఖలో అసిస్టెంట్ ఎగ్జిక్యూటివ్ ఇంజనీర్ (AEE-Civil) పోస్టుల భర్తీకి నిర్వహించనున్న పరీక్షలకు తెలంగాణ పబ్లిక్ సర్వీస్ కమిషన్ (TGPSC) అన్ని ఏర్పాట్లు పూర్తి చేసింది. నవంబర్ 6, 7 తేదీల్లో రాష్ట్రవ్యాప్తంగా కంప్యూటర్ బేస్డ్ రిక్రూట్‌మెంట్ టెస్ట్ (CBRT) విధానంలో పరీక్షలు నిర్వహించనుంది. ఈ నేపథ్యంలో పరీక్షకు హాజరయ్యే అభ్యర్థులకు కమిషన్ పలు కీలక సూచనలు జారీ చేసింది.
తెలంగాణ పబ్లిక్ సర్వీస్ కమిషన్ ఆధ్వర్యంలో నిర్వహించనున్న ఈ నియామక పరీక్షలకు మొత్తం 29,078 మంది అభ్యర్థులు దరఖాస్తు చేసుకున్నారు. వీరి కోసం రాష్ట్రంలోని 14 జిల్లాల్లో 38 పరీక్షా కేంద్రాలను ఏర్పాటు చేశారు. ఎలాంటి అవకతవకలకు అవకాశం లేకుండా పకడ్బందీ నిఘా మధ్య ఆన్‌లైన్ విధానంలో పరీక్షలు నిర్వహించేందుకు అధికారులు ఏర్పాట్లు చేశారు.
రెండు రోజుల పరీక్షల షెడ్యూల్ ఇదే:
నవంబర్ 6, 7 తేదీల్లో రెండు సెషన్లుగా పరీక్షలు జరగనున్నాయి. ఉదయం 10 గంటల నుంచి మధ్యాహ్నం 12:30 గంటల వరకు పేపర్-1 జనరల్ స్టడీస్ అండ్ జనరల్ ఎబిలిటీస్ పరీక్ష నిర్వహిస్తారు. ఇక మధ్యాహ్నం 2:30 గంటల నుంచి సాయంత్రం 5 గంటల వరకు పేపర్-2 సివిల్ ఇంజనీరింగ్ పరీక్ష ఉంటుంది. అభ్యర్థులు తమ హాల్‌టికెట్‌లో పేర్కొన్న పరీక్షా కేంద్రం చిరునామాను ముందుగానే పరిశీలించుకోవాలని టీజీపీఎస్సీ సూచించింది. చివరి నిమిషంలో ఇబ్బందులు తలెత్తకుండా పరీక్షా కేంద్రానికి వెళ్లే మార్గాన్ని ముందుగానే తెలుసుకోవాలని కోరింది.
పరీక్షా కేంద్రంలోకి ఎప్పటి నుంచి అనుమతి అంటే..
పరీక్ష ప్రారంభానికి ముందు అభ్యర్థుల బయోమెట్రిక్ వెరిఫికేషన్, ఫొటో క్యాప్చర్ తదితర ప్రక్రియలు నిర్వహించనున్నారు. ఉదయం సెషన్‌కు హాజరయ్యే వారు ఉదయం 8:30 నుంచి 9:30 గంటల మధ్య, మధ్యాహ్నం సెషన్‌కు హాజరయ్యే వారు మధ్యాహ్నం 1 గంట నుంచి 2 గంటల మధ్య ఈ ప్రక్రియలను పూర్తి చేసుకోవాలి. నిర్ణీత సమయం తర్వాత వచ్చే వారికి ఇబ్బందులు ఎదురయ్యే అవకాశం ఉన్నందున ముందుగానే కేంద్రానికి చేరుకోవడం మంచిది.
అభ్యర్థులు తప్పనిసరిగా పాటించాల్సిన నిబంధనలు:
పరీక్షల్లో అక్రమాలకు అడ్డుకట్ట వేసేందుకు బయోమెట్రిక్ విధానంలో వేలిముద్రలను సేకరించనున్నారు. అందువల్ల అభ్యర్థులు చేతులకు మెహందీ పెట్టుకోవడం, వేలిముద్రల గుర్తింపునకు ఆటంకం కలిగించే టాటూలు వేయించుకోవడం వంటి వాటికి దూరంగా ఉండాలని కమిషన్ సూచించింది.
పరీక్షా కేంద్రంలోకి వెళ్లేటప్పుడు హాల్‌టికెట్, ఒరిజినల్ ఫొటో గుర్తింపు కార్డు, నలుపు లేదా నీలం రంగు పెన్ను మాత్రమే తీసుకెళ్లేందుకు అనుమతి ఉంటుంది. మొబైల్ ఫోన్లు, కాలిక్యులేటర్లు సహా ఎలాంటి ఎలక్ట్రానిక్ గాడ్జెట్లను అనుమతించరు. అలాగే అభ్యర్థులు బూట్లు ధరించకుండా కేవలం చెప్పులతోనే పరీక్షకు హాజరుకావాలని స్పష్టం చేశారు.
టీజీపీఎస్సీ నిబంధనలను ప్రతి ఒక్కరూ తప్పనిసరిగా పాటించాలని అధికారులు సూచించారు. నిబంధనలను ఉల్లంఘించిన అభ్యర్థులపై కఠిన చర్యలు తీసుకోవడంతో పాటు పరీక్షకు అనర్హులుగా ప్రకటించే అవకాశం ఉందని హెచ్చరించారు. అందువల్ల అభ్యర్థులు ముందుగానే అన్ని ఏర్పాట్లు చేసుకుని ప్రశాంతంగా పరీక్షకు హాజరుకావాలని కమిషన్ సూచించింది.