భారతీయ ఇతిహాసం రామాయణం ఆధారంగా తెరకెక్కిన ‘రామాయణ: పార్ట్ 1’ ప్రేక్షకుల ముందుకు వచ్చింది. భారీ బడ్జెట్‌తో దర్శకుడు నితేశ్ తివారీ రూపొందించిన ఈ చిత్రాన్ని యశ్, నమిత్ మల్హోత్రా సంయుక్తంగా నిర్మించారు. తాజాగా ఈ సినిమాను వీక్షించిన దర్శకధీరుడు ఎస్‌.ఎస్‌.రాజమౌళి తన అభిప్రాయాన్ని వెల్లడిస్తూ చిత్రబృందంపై ప్రశంసలు కురిపించారు.
ఇంటర్నెట్ డెస్క్: రామాయణ ఇతిహాసాన్ని మరోసారి వెండితెరపై ఆవిష్కరిస్తూ రూపొందించిన చిత్రం ‘రామాయణ: పార్ట్ 1’. అత్యున్నత సాంకేతిక ప్రమాణాలు, భారీ నిర్మాణ వ్యయంతో తెరకెక్కిన ఈ సినిమా నవంబర్ 5న ప్రేక్షకుల ముందుకు వచ్చింది. బాలీవుడ్ స్టార్ రణ్‌బీర్ కపూర్ శ్రీరాముడిగా, కన్నడ నటుడు యశ్ రావణుడిగా, సాయిపల్లవి సీతాదేవిగా కీలక పాత్రలు పోషించారు. నితేశ్ తివారీ దర్శకత్వం వహించిన ఈ చిత్రంపై తాజాగా టాలీవుడ్ అగ్ర దర్శకుడు ఎస్‌.ఎస్‌.రాజమౌళి స్పందించారు. సినిమా చూసిన అనంతరం తన అభిప్రాయాలను సోషల్ మీడియా ద్వారా పంచుకున్నారు.
భారతీయ ఇతిహాసాన్ని ఇంత భారీ స్థాయిలో తెరకెక్కించడం గొప్ప ప్రయత్నమని రాజమౌళి ప్రశంసించారు. సినిమాలోని విజువల్ ఎఫెక్ట్స్, నిర్మాణ విలువలు తనను ఆకట్టుకున్నాయని తెలిపారు. ప్రతి ఫ్రేమ్‌లోనూ చిత్రబృందం చేసిన కృషి స్పష్టంగా కనిపిస్తోందని పేర్కొన్నారు. ముఖ్యంగా శ్రీరాముడి పాత్రలో రణ్‌బీర్ కపూర్ నటన అద్భుతంగా ఉందని కొనియాడారు. వనవాస ఘట్టం మొదలైన తర్వాత ఆయన ప్రదర్శించిన ప్రశాంతత, గంభీరత పాత్రకు మరింత అందాన్ని తీసుకొచ్చాయని అభిప్రాయపడ్డారు. రాముడి పాత్రకు అవసరమైన హుందాతనాన్ని రణ్‌బీర్ చక్కగా ప్రదర్శించారని ప్రశంసించారు.
ఇక రావణుడి పాత్రలో కనిపించిన యశ్ నటనపైనా రాజమౌళి ప్రత్యేకంగా స్పందించారు. తెరపై యశ్ కనిపించిన ప్రతిసారీ బలమైన ప్రభావం చూపించారని పేర్కొన్నారు. రావణుడి పాత్రకు అవసరమైన భయంకరమైన రూపం, గంభీరమైన వ్యక్తిత్వాన్ని ఆయన అద్భుతంగా ఆవిష్కరించారని ప్రశంసించారు. మరోవైపు సీతాదేవిగా నటించిన సాయిపల్లవి కూడా తన సహజమైన అభినయంతో ఆకట్టుకున్నారని తెలిపారు. పాత్రకు కావాల్సిన గౌరవం, హుందాతనాన్ని తెరపై అద్భుతంగా ప్రదర్శించారని కొనియాడారు.
సినిమాలోని ప్రీ క్లైమాక్స్, క్లైమాక్స్ సన్నివేశాలు తనను విశేషంగా ఆకట్టుకున్నాయని రాజమౌళి వెల్లడించారు. ముఖ్యంగా చివరి భాగంలోని సన్నివేశాలు ప్రేక్షకులను కట్టిపడేసేలా ఉన్నాయని అభిప్రాయపడ్డారు. సినిమా మొత్తాన్ని ఎంతో ఆస్వాదించానని తెలిపారు. ఇంతటి భారీ ప్రాజెక్టును అద్భుతమైన దృశ్యరూపంలో రూపొందించి ప్రేక్షకుల ముందుకు తీసుకొచ్చిన నిర్మాత నమిత్ మల్హోత్రా, దర్శకుడు నితేశ్ తివారీతో పాటు మొత్తం చిత్రబృందానికి అభినందనలు తెలియజేశారు. రాజమౌళి వంటి దిగ్గజ దర్శకుడి ప్రశంసలు అందుకోవడంతో ‘రామాయణ: పార్ట్ 1’పై ప్రేక్షకుల్లో ఆసక్తి మరింత పెరిగింది.