బంగాళాఖాతంలో ఏర్పడిన మురసు తుఫాన్ ప్రభావం తెలంగాణపై కనిపిస్తోంది. రాష్ట్రంలో వాతావరణ పరిస్థితులు మారుతుండటంతో పలు జిల్లాలకు వర్ష సూచన జారీ అయింది. రాబోయే 24 నుంచి 48 గంటల్లో ఎనిమిది జిల్లాల్లో ఉరుములు, మెరుపులతో కూడిన వర్షాలు కురిసే అవకాశం ఉందని హైదరాబాద్ వాతావరణ కేంద్రం వెల్లడించింది. ఈ నేపథ్యంలో ఆయా జిల్లాలకు ఎల్లో అలర్ట్ ప్రకటించింది.
ఈ 8 జిల్లాల్లో వర్షాలు కురిసే ఛాన్స్
వాతావరణ శాఖ అంచనాల ప్రకారం ఉత్తర, తూర్పు తెలంగాణ ప్రాంతాల్లో తుఫాన్ ప్రభావం అధికంగా ఉండే అవకాశం ఉంది. ఆదిలాబాద్, నిర్మల్, నిజామాబాద్, మంచిర్యాల, భద్రాద్రి కొత్తగూడెం, ఖమ్మం, జయశంకర్ భూపాలపల్లి, ములుగు జిల్లాల్లో అక్కడక్కడా వర్షాలు పడవచ్చని అధికారులు తెలిపారు. కొన్ని ప్రాంతాల్లో ఉరుములు, మెరుపులతో కూడిన తేలికపాటి నుంచి మోస్తరు వర్షాలు కురిసే సూచనలు ఉన్నాయని పేర్కొన్నారు.
వర్షాల సమయంలో గంటకు 30 నుంచి 40 కిలోమీటర్ల వేగంతో బలమైన ఈదురుగాలులు వీచే అవకాశం ఉందని హెచ్చరించారు. ప్రజలు అప్రమత్తంగా ఉండాలని, వాతావరణ శాఖ సూచనలను పాటించాలని అధికారులు సూచిస్తున్నారు.
అకాల వర్షాలతో రైతుల్లో ఆందోళన
మరోవైపు ఖరీఫ్ పంటల కోతలు కొనసాగుతున్న సమయంలో వర్ష సూచనలు రావడం రైతులను కలవరపెడుతోంది. ఇప్పటికే చాలా ప్రాంతాల్లో వరి కోతలు జరుగుతుండగా, మరికొన్ని చోట్ల ధాన్యం కొనుగోలు ప్రక్రియ కొనసాగుతోంది. ఇలాంటి తరుణంలో అకాల వర్షాలు కురిస్తే కల్లాల్లో ఆరబెట్టిన ధాన్యం తడిసిపోయే ప్రమాదం ఉంది. దీంతో రైతులు ఆందోళన చెందుతున్నారు.
ఈ నేపథ్యంలో రైతులు పంటను కాపాడుకునేందుకు ముందస్తు చర్యలు తీసుకోవాలని అధికారులు సూచిస్తున్నారు. కల్లాల్లో ఉన్న ధాన్యంపై టార్పాలిన్లు కప్పి భద్రపరుచుకోవాలని, వర్ష సూచనలు ఉన్నప్పుడు వీలైనంత త్వరగా సురక్షిత ప్రాంతాలకు తరలించాలని చెబుతున్నారు. అలాగే ఉరుములు, మెరుపులతో కూడిన వర్షాలు పడే సమయంలో చెట్ల కింద ఆశ్రయం పొందవద్దని, పాత భవనాలకు దూరంగా ఉండాలని ప్రజలకు సూచించారు.
ఏపీలోనూ మురసు ప్రభావం.. పలు జిల్లాల్లో వర్షాలు
తెలంగాణతో పాటు ఆంధ్రప్రదేశ్‌లోనూ మురసు తుఫాన్ ప్రభావం ఉండనుంది. పోలవరం, కాకినాడ, ఎన్టీఆర్, కృష్ణా, బాపట్ల, పల్నాడు జిల్లాల్లో భారీ వర్షాలు కురిసే అవకాశం ఉందని వాతావరణ శాఖ అంచనా వేసింది. మన్యం, తూర్పుగోదావరి, పశ్చిమగోదావరి, కోనసీమ, ఏలూరు జిల్లాల్లోని కొన్ని ప్రాంతాల్లో మోస్తరు వర్షాలు పడవచ్చని తెలిపింది.
ఇప్పటికే ఏపీలోని పలు ప్రాంతాల్లో ఈదురుగాలుల కారణంగా చెట్లు నేలకొరిగినట్లు, కొన్ని చోట్ల పంటలు నీటమునిగినట్లు సమాచారం. దీంతో అన్నదాతలు ఆందోళన చెందుతున్నారు. పరిస్థితులను ఎప్పటికప్పుడు సమీక్షిస్తున్నామని రాష్ట్ర ప్రభుత్వం వెల్లడించింది. పంట నష్టంపై వివరాలు సేకరించి, నష్టపోయిన రైతులకు తగిన సహాయం అందించేలా చర్యలు తీసుకుంటామని తెలిపింది.