నేపాల్‌లోని ఎవరెస్ట్ ప్రాంతంలో ఘోర ప్రమాదం చోటుచేసుకుంది. రెండు హెలికాప్టర్లు ల్యాండ్ అవుతున్న సమయంలో ఒకదానికొకటి ఢీకొనడంతో భారతీయ పర్యాటకుడు మృతి చెందాడు. మరో ప్రయాణికుడితో పాటు ఇద్దరు పైలట్లు గాయపడ్డారు.
ఉదయం 8:11 గంటలకు ప్రమాదం
సోలుఖుంబు జిల్లాలోని ఫెరిచే హెలిప్యాడ్ వద్ద మంగళవారం (నవంబర్ 3) ఉదయం సుమారు 8:11 గంటలకు ఈ ఘటన జరిగింది. ఫిష్‌టెయిల్ ఎయిర్, ఎయిర్ డైనాస్టీ సంస్థలకు చెందిన హెలికాప్టర్లు ల్యాండ్ అయ్యేందుకు ప్రయత్నిస్తున్న సమయంలో ఢీకొన్నట్లు జిల్లా పోలీసులు వెల్లడించారు.
మృతుడు భారతీయుడు.. గాయపడిన వ్యక్తి న్యూజిలాండ్ పౌరుడు
ప్రమాదంలో మృతి చెందిన భారతీయుడిని వసంత్ కుమార్ బాలరామరమడు (Vasanth Kumar Balaramaramadu)గా పోలీసులు గుర్తించారు. ఆయన ఫిష్‌టెయిల్ ఎయిర్ హెలికాప్టర్‌లో ప్రయాణిస్తున్నారు.
అదే హెలికాప్టర్‌లో ఉన్న భారత సంతతికి చెందిన న్యూజిలాండ్ పౌరుడు శైలేష్ కృష్ణ పటేల్ గాయపడ్డారు. ఆయనను ప్రభు ఎయిర్ హెలికాప్టర్ ద్వారా ఖాట్మండులోని మెడిసిటీ ఆసుపత్రికి తరలించారు. ప్రమాదంలో గాయపడిన ఇద్దరు పైలట్లను కూడా చికిత్స కోసం ఖాట్మండుకు తీసుకెళ్లినట్లు అధికారులు తెలిపారు.
ప్రమాదానికి కారణం ఏంటి?
ఎత్తైన పర్వత ప్రాంతంలో ల్యాండింగ్ సమయంలో ఈ ప్రమాదం జరగగా, అసలు కారణం ఇంకా తెలియాల్సి ఉంది. హెలికాప్టర్లలో మొత్తం ఎంతమంది ప్రయాణికులు ఉన్నారనే వివరాలను పోలీసులు సేకరిస్తున్నారు. ఘటనపై దర్యాప్తు కొనసాగుతోంది.
నేపాల్‌లోని ఎవరెస్ట్ ప్రాంతానికి పర్యాటకులు, పర్వతారోహకులను తరలించేందుకు హెలికాప్టర్ సేవలు కీలకంగా ఉంటాయి. ఈ నేపథ్యంలో జరిగిన ప్రమాదం స్థానికంగా ఆందోళన కలిగించింది.