టీమిండియా స్టార్ ఆల్‌రౌండర్ హార్దిక్ పాండ్యాకు గాయాల బెడద మళ్లీ మొదలైంది. కుడి కాలి కింది భాగంలో తాజాగా గాయం అయినట్లు స్కాన్లలో గుర్తించారు. దీంతో అతడు కనీసం మూడు వారాల పాటు క్రికెట్‌కు దూరంగా ఉండనున్నట్లు తెలుస్తోంది. ఈ పరిణామంతో న్యూజిలాండ్‌తో జరగనున్న వైట్‌బాల్ సిరీస్‌కు కూడా హార్దిక్ అందుబాటులో ఉండకపోవచ్చని సమాచారం.
ఆస్ట్రేలియా-A సిరీస్‌కు ముందే గాయం
హార్దిక్ పాండ్యా తిరిగి మైదానంలోకి రావడానికి సెప్టెంబర్ 20ను తొలుత లక్ష్యంగా పెట్టుకున్నారు. అక్టోబర్ 6 నుంచి ఆస్ట్రేలియా-Aతో జరగనున్న వన్డే సిరీస్ కోసం భారత్-A జట్టులోనూ అతడికి చోటు కల్పించారు. అయితే తాజాగా నిర్వహించిన వైద్య పరీక్షల్లో కుడి కాలి కింది భాగంలో గాయం బయటపడింది.
దీంతో బీసీసీఐ వైద్య బృందం అతడికి రెండు వారాల పాటు పూర్తి విశ్రాంతి తీసుకోవాలని సూచించినట్లు సమాచారం. బీసీసీఐ సెంటర్ ఆఫ్ ఎక్సలెన్స్‌లో హార్దిక్ పరిస్థితిని వైద్యులు ఎప్పటికప్పుడు పర్యవేక్షిస్తున్నారు. మెడికల్ ప్యానెల్ చీఫ్ డాక్టర్ దిన్షా పార్డీవాలా కూడా అతడి వైద్య నివేదికలను పరిశీలించినట్లు తెలుస్తోంది. ఆయన జపాన్ నుంచి తిరిగొచ్చిన తర్వాత హార్దిక్‌ను పరీక్షించి, పునరావాస శిక్షణ ఎప్పుడు ప్రారంభించాలనే దానిపై నిర్ణయం తీసుకోనున్నారు.
అక్టోబర్ 22 నుంచి న్యూజిలాండ్‌తో భారత్ టీ20 సిరీస్ ఆడనుంది. అనంతరం వన్డే సిరీస్ జరగనుంది. ప్రస్తుత గాయం నుంచి కోలుకోవడానికి సమయం పట్టే అవకాశం ఉండటంతో ఈ సిరీస్‌లకు హార్దిక్ దూరమయ్యే పరిస్థితులు కనిపిస్తున్నాయి.
ఆసియా క్రీడలకు వెళ్లాల్సిన హార్దిక్‌కు నిరాశ
ఆసియా క్రీడల కోసం భారత బృందంతో పాటు హార్దిక్‌ను కూడా జపాన్‌కు పంపించాలని బీసీసీఐ తొలుత భావించింది. ఇందుకోసం అతడి పాస్‌పోర్టును సైతం వీసా ప్రక్రియ కోసం తీసుకున్నట్లు సమాచారం. అయితే ఆఫ్ఘనిస్థాన్‌తో టీ20 సిరీస్‌కు ముందు ఫీల్డింగ్ ప్రాక్టీస్ చేస్తుండగా హార్దిక్‌కు మోకాలి ప్రాంతంలో తీవ్ర నొప్పి వచ్చింది.
దీంతో కొంతకాలం విశ్రాంతి తీసుకున్న అతడు ఫిట్‌నెస్ సర్టిఫికెట్ పొందేందుకు సిద్ధమవుతున్న సమయంలో మళ్లీ నొప్పి మొదలైంది. తాజాగా స్కాన్లు చేయించగా గాయం ఉన్నట్లు నిర్ధారణ అయింది. ఐపీఎల్ ముగిసినప్పటి నుంచి బెంగళూరులో ఉంటున్న హార్దిక్ ప్రస్తుతం సెంటర్ ఆఫ్ ఎక్సలెన్స్‌లో శిక్షణ తీసుకుంటున్నాడు.
హార్దిక్ పునరాగమనం ఎప్పుడంటే?
గత నాలుగు నెలలుగా హార్దిక్‌ను గాయాలు పదేపదే ఇబ్బంది పెడుతున్నాయి. ఆఫ్ఘనిస్థాన్ వన్డేలు, ఇంగ్లండ్ టీ20లు, ఇప్పుడు ఆస్ట్రేలియా-A సిరీస్‌కు ముందు గాయాల కారణంగా అతడి పునరాగమనం ఆలస్యమవుతోంది.
న్యూజిలాండ్ సిరీస్‌కు కూడా దూరమైతే, హార్దిక్ జింబాబ్వేతో జరిగే వన్డే సిరీస్ ద్వారా తిరిగి మైదానంలోకి వచ్చే అవకాశం ఉందని తెలుస్తోంది. ఒకవేళ అప్పటికి పూర్తి ఫిట్‌నెస్ సాధించకపోతే విజయ్ హజారే ట్రోఫీ లేదా సయ్యద్ ముస్తాక్ అలీ ట్రోఫీలో ఆడుతూ తన ఫిట్‌నెస్‌ను పరీక్షించుకునే అవకాశం ఉంది. అయితే అతడి రీఎంట్రీపై బీసీసీఐ వైద్య బృందం తీసుకునే నిర్ణయమే కీలకం కానుంది.