D Educt: Sept 24: NEET PG 2026 Results: నీట్ పీజీ ఫలితాలు విడుదల
నేషనల్ బోర్డ్ ఆఫ్ ఎగ్జామినేషన్స్ ఇన్ మెడికల్ సైన్సెస్ (NBEMS) నీట్ పీజీ 2026 ప్రవేశ పరీక్ష ఫలితాలను అధికారికంగా విడుదల చేసింది. పరీక్షకు హాజరైన అభ్యర్థులు తమ ఫలితాలు, ర్యాంకు వివరాలను NBEMS అధికారిక వెబ్సైట్ ద్వారా పరిశీలించి డౌన్లోడ్ చేసుకోవచ్చు.
ఆగస్టు 30న నీట్ పీజీ 2026 పరీక్ష నిర్వహించారు. జైపూర్లోని రెండు పరీక్షా కేంద్రాల్లో సాంకేతిక సమస్యలు తలెత్తడంతో ప్రభావితమైన అభ్యర్థులకు ప్రత్యేకంగా రీ-ఎగ్జామ్ నిర్వహించారు. ఈ ప్రక్రియ పూర్తయిన అనంతరం NBEMS తుది ఫలితాలను ప్రకటించింది.
కేటగిరీల వారీగా కటాఫ్ మార్కులు
ఫలితాలతో పాటు వివిధ కేటగిరీలకు సంబంధించిన క్వాలిఫైయింగ్ కటాఫ్ మార్కులను కూడా NBEMS వెల్లడించింది. మొత్తం 720 మార్కులకు గాను జనరల్, EWS అభ్యర్థులకు 50వ పర్సంటైల్తో 262 మార్కులు, జనరల్ PwBD అభ్యర్థులకు 45వ పర్సంటైల్తో 244 మార్కులు కటాఫ్గా నిర్ణయించారు. SC, ST, OBC కేటగిరీలకు చెందిన అభ్యర్థులకు, PwBD అభ్యర్థులతో సహా 40వ పర్సంటైల్తో 226 మార్కులు కటాఫ్గా పేర్కొన్నారు.
ఈ కటాఫ్కు సమానంగా లేదా అంతకంటే ఎక్కువ మార్కులు సాధించిన అభ్యర్థులు తదుపరి జరిగే కౌన్సెలింగ్ ప్రక్రియలో పాల్గొనేందుకు అర్హత పొందుతారు.
NEET PG 2026 ఫలితాలను ఇలా చెక్ చేసుకోండి
అభ్యర్థులు ముందుగా NBEMS అధికారిక వెబ్సైట్ను సందర్శించాలి. అనంతరం హోమ్పేజీలోని ‘Examinations’ విభాగంలోకి వెళ్లి ‘NEET-PG’ ఆప్షన్ను ఎంచుకోవాలి. అక్కడ ‘NEET PG 2026’ విభాగంలో ఉన్న ‘Results’ లింక్పై క్లిక్ చేయాలి.
ఫలితాల PDF తెరుచుకున్న తర్వాత అందులో తమ రోల్ నంబర్ను వెతికి ర్యాంకు, స్కోరు వివరాలను పరిశీలించుకోవచ్చు.
అక్టోబర్ 1 నుంచి స్కోర్కార్డులు
అభ్యర్థుల వ్యక్తిగత స్కోర్కార్డులు అక్టోబర్ 1, 2026 నుంచి అధికారిక వెబ్సైట్లో డౌన్లోడ్ చేసుకునేందుకు అందుబాటులో ఉంటాయి. స్కోర్కార్డులను ఆరు నెలల పాటు వెబ్సైట్ నుంచి పొందే అవకాశం ఉంటుంది. NBEMS అభ్యర్థులకు స్కోర్కార్డులను పోస్టు లేదా ఈమెయిల్ ద్వారా వ్యక్తిగతంగా పంపదు. అభ్యర్థులే వాటిని వెబ్సైట్ నుంచి డౌన్లోడ్ చేసుకోవాల్సి ఉంటుంది.
ఫైనల్ ఆన్సర్ కీ కూడా విడుదల
సుప్రీంకోర్టు ఆదేశాలకు అనుగుణంగా ఫైనల్ ఆన్సర్ కీని అక్టోబర్ 1 లేదా ఆ తర్వాత విడుదల చేయనున్నట్లు NBEMS తెలిపింది. అభ్యర్థులు తమ లాగిన్ వివరాలను ఉపయోగించి ప్రశ్నల ఐడీ, సరైన సమాధానం, తాము ఎంచుకున్న సమాధానం వంటి వివరాలను పరిశీలించుకునే అవకాశం ఉంటుంది.