DSports o2May 2026:హైదరాబాద్:సోషల్ మీడియా వేదికగా యువతులకు ప్రేమ వల విసిరి, వారిని బ్లాక్మెయిల్ చేస్తూ లక్షలాది రూపాయలు వసూలు చేస్తున్న ఒక ముఠా బండారాన్ని జూబ్లీహిల్స్ పోలీసులు బట్టబయలు చేశారు. ఈ కేసులో ప్రధాన నిందితుడైన అర్జున్ అలియాస్ ఆజాద్తో పాటు అతని సోదరుడు రాజీవ్ను పోలీసులు అరెస్ట్ చేశారు.
- నిందితులు ఇన్స్టాగ్రామ్లో ఖరీదైన కార్లు, బ్రాండెడ్ దుస్తులు, విలాసవంతమైన హోటల్స్ మరియు పబ్బుల్లో దిగిన ఫొటోలు, రీల్స్ను పోస్ట్ చేసేవారు. తాము కూడా పెద్ద ధనవంతులమని నమ్మబలికి, జూబ్లీహిల్స్, బంజారాహిల్స్ వంటి ప్రాంతాల్లోని సంపన్న కుటుంబాల అమ్మాయిలను లక్ష్యంగా చేసుకునేవారు.
- ముఖ్యంగా విదేశాల్లో ఉండే తల్లిదండ్రుల పిల్లలపై, ఒంటరిగా ఉండే మైనర్ అమ్మాయిలపై వీరు నిఘా పెట్టేవారు. పరిచయం చేసుకున్న కొద్దిరోజులకే ప్రేమ నటిస్తూ, పెళ్లి చేసుకుంటామని నమ్మించేవారు.
- యువతులతో సాన్నిహిత్యం పెరిగిన తర్వాత వారి వ్యక్తిగత ఫొటోలు, వీడియోలను సేకరించి వాటిని అడ్డం పెట్టుకుని బ్లాక్మెయిలింగ్కు పాల్పడేవారు. ఒక ప్రముఖ పారిశ్రామికవేత్త కుమార్తెను బెదిరించి సుమారు రూ. 30 లక్షల వరకు వసూలు చేసినట్లు దర్యాప్తులో తేలింది.
- ఈ ముఠా ఇప్పటివరకు సుమారు 20 మందికి పైగా యువతులను ఇదే తరహాలో మోసం చేసినట్లు పోలీసులు అనుమానిస్తున్నారు. నిందితుడు అర్జున్ గుంటూరు జిల్లాకు చెందినవాడని, అతనిపై నగరంలోని వివిధ స్టేషన్లలో పాత కేసులు కూడా ఉన్నాయని వెల్లడించారు.
నిందితుడు రాజీవ్ను బెంగళూరులో పట్టుకున్న పోలీసులు, ప్రస్తుతం ఇద్దరు సోదరులను కస్టడీలోకి తీసుకుని విచారిస్తున్నారు. సోషల్ మీడియాలో పరిచయం లేని వ్యక్తులతో స్నేహం చేసేటప్పుడు, ముఖ్యంగా పిల్లల విషయంలో తల్లిదండ్రులు అప్రమత్తంగా ఉండాలని జూబ్లీహిల్స్ పోలీసులు సూచించారు.