పవన్ కళ్యాణ్ 54వ పుట్టినరోజు సందర్భంగా అభిమానులు ఆయనకు ఊహించని సర్ప్రైజ్ ఇచ్చారు. ఆయన నటించిన OG సినిమా తొలి టికెట్ను ఆన్లైన్ వేలం ద్వారా ₹5 లక్షలకు కొనుగోలు చేశారు. ఈ మొత్తాన్ని జనసేన పార్టీకి విరాళంగా ఇస్తామని ప్రకటించడం ప్రధాన ఆకర్షణగా నిలిచింది. టీమ్ పవన్ కళ్యాణ్ నార్త్ అమెరికా అనే అభిమాన సంఘం ఈ బిడ్ను గెలుచుకుంది. ఆయన పుట్టినరోజుకు ఒక రోజు ముందు జరిగిన ఈ వేలంలో పెద్ద సంఖ్యలో అభిమానులు పాల్గొన్నారు. చివరికి, టికెట్ ₹5 లక్షల రికార్డు ధరకు అమ్ముడై ఒక కొత్త మైలురాయిని సృష్టించింది.
పవర్ స్టార్ పవన్ కళ్యాణ్ నటించిన OG చిత్రం విడుదలకు సిద్ధమవుతోంది. ఇది పీరియాడికల్ గ్యాంగ్స్టర్ డ్రామాగా తెరకెక్కిన సినిమా. దీనిని డీవీవీ ఎంటర్టైన్మెంట్స్ బ్యానర్పై డీవీవీ దానయ్య నిర్మించారు. యువ దర్శకుడు సుజిత్ ఈ చిత్రానికి దర్శకత్వం వహించగా, ప్రియాంక మోహన్ కథానాయికగా నటించారు. బాలీవుడ్ నటుడు ఇమ్రాన్ హష్మీ విలన్గా నటించారు.
పవన్ కళ్యాణ్ పుట్టినరోజు సందర్భంగా చిత్రబృందం మంగళవారం కొన్ని ఆసక్తికరమైన అప్డేట్లను విడుదల చేసింది. పవన్ కొత్త పోస్టర్తో పాటు, ఇమ్రాన్ హష్మీ పాత్రను ఒక చిన్న టీజర్ ద్వారా పరిచయం చేశారు. పవన్ కళ్యాణ్ అభిమానులు తెలుగు రాష్ట్రాలలో ఆయన పుట్టినరోజును ఘనంగా నిర్వహించారు. రక్తదాన శిబిరాలు, అన్నదానాలు, నిరుపేదలకు నిత్యావసర వస్తువుల పంపిణీ వంటి కార్యక్రమాల ద్వారా ఆయనపై తమ అభిమానాన్ని చాటుకున్నారు.